مصر تخطط لجذب استثمارات بأكثر من 4 مليارات دولار للمنطقة الاقتصادية
المنطقة الاقتصادية لقناة السويس بقت كلمة السر في خطط مصر الاقتصادية الجديدة .. الدولة شايفة فيها مستقبل الصناعة والتجارة، وبتجهز علشان تبقى مركز جذب عالمي للمستثمرين من كل حتة في الدنيا.
وفي خطوة قوية جدًا، الهيئة العامة للمنطقة الاقتصادية أعلنت عن خطة لجذب استثمارات جديدة تتجاوز 4.4 مليار دولار خلال السنة المالية الجاية.. الخطة دي مش مجرد أرقام، دي رؤية كاملة علشان مصر تبقى محور التصنيع والخدمات اللوجستية في الشرق الأوسط.
رئيس الهيئة العامة للمنطقة الاقتصادية لقناة السويس، وليد جمال الدين، أعلن إن الهيئة بتستهدف جذب أكتر من 4.4 مليار دولار استثمارات جديدة خلال العام المالي 2025/2026، وده جزء من خطة كبيرة لتعزيز مكانة المنطقة كمركز صناعي ولوجستي عالمي.
المنطقة دي بقت محط أنظار العالم كله، خصوصًا بعد النجاحات اللي حققتها في آخر كام سنة، وسبب ده هو الموقع الاستراتيجي الفريد على قناة السويس، اللي بيربط بين آسيا وإفريقيا وأوروبا، وده بيخليها نقطة مثالية لأي مستثمر بيدوّر على مكان يوصله للعالم كله.
جمال الدين كمان كشف إن في مفاوضات متقدمة مع مطور صناعي ياباني علشان يدخل استثمارات يابانية لأول مرة في تاريخ المنطقة الاقتصادية، وده معناه إن مصر بتفتح أبوابها لدول جديدة وبتنوّع شركاءها الصناعيين.
وخليني اقولك ان في كلمته خلال منتدى القاهرة الاقتصادي، استعرض رحلة التطور اللي حصلت في المنطقة، وقال إن خلال ال 3 سنين ونص اللي فاتوا، دخل استثمارات أجنبية بحوالي 11 مليار دولار، مقابل حوالي 2 مليار دولار بس من 2015 لحد 2022.. يعني حصل قفزة ضخمة بتوضح قد إيه المنطقة بقت جاذبة لرؤوس الأموال العالمية.
ممن ناحية تانية، جمال الدين وضح إن الهيئة شغالة مع أجهزة الدولة علشان تخلي المنطقة واحدة من أكبر مناطق التصنيع في الشرق الأوسط، وده من خلال توفير بنية تحتية قوية، عمالة مدرّبة، وأسعار طاقة تنافسية، يعني المستثمر لما ييجي يلاقي كل حاجة جاهزة وسهلة.
يعني مصر دلوقتي عندها فرصة فريدة لجذب استثمارات ضخمة في ظل التغيرات اللي بتحصل في الاقتصاد العالمي، خصوصًا بعد تحولات سلاسل الإمداد الدولية، واللي خلت دول كتير تدور على مناطق آمنة ومستقرة تستثمر فيها، ومصر من الدول القليلة اللي قدرت تقدم ده بوضوح.
أما عن الشراكة مع الصين، فهي من أكبر وأقوى العلاقات داخل المنطقة الاقتصادية، لأن الاستثمارات الصينية وصلت لـ5.5 مليار دولار في آخر 3 سنين ونص، وده في مجالات الصناعة والطاقة والبنية التحتية.
يعني دلوقتي نقدر نقول ان المنطقة الاقتصادية بقت محور استراتيجي عالمي لجذب الاستثمارات، مدعومة بتسهيلات كبيرة من الحكومة وموقع جغرافي مميز، وبيتهيأ عشان اللي جاي هيكون أكبر بكتير، لأن مصر ماشية بخطوات واثقة علشان تبقى بوابة الاستثمار في الشرق الأوسط وإفريقيا.
