تأثيرات مرتقبة على الذهب والدولار.. إيه اللي هيحصل في مصر بعد قرار الاحتياطي الفيدرالي الأمريكي؟
هو إيه اللي هيحصل للجنيه والفايدة في مصر بعد قرار الفيدرالي الأمريكي؟ هل المركزي المصري هيمشي ورا الفيدرالي بالحرف؟ ولو الفيدرالي خفض… هل ده معناه إننا داخلين على خفض فايدة هنا؟ ولا الصورة عندنا مختلفة تمامًا؟.. الأسئلة دي هي محور ترقّب السوق قبل اجتماع البنك المركزي المصري اللي جاي… لأن قرار الفيدرالي مش مجرد خبر عادي لا ده هيكون ليه تأثير كبير جدا على حجت كتيرة فى أسواق العالم.
الفيدرالي الأمريكي داخل اجتماعه وهو في اتجاه واضح للتيسير… توقعات السوق خلاص شبه محسومة إن الفيدرالي هيخفض 25 نقطة أساس علشان يدعم النشاط الاقتصادي بعد شهور من التشديد وفي ظل استمرار الضغوط التضخمية هناك ورغبتهم في تجنب ركود حاد.
بس… هل ده معناه إن المركزي المصري هينزل الفايدة مباشرة بعده؟
الإجابة: لأ… الموضوع هنا مش زي الفيدرلي خلص.. لأن دوافع الفيدرالي مختلفة 180 درجة عن دوافع المركزي عندنا.. الفيدرالي بيتعامل مع اقتصاد قوي بالدولار أقوى عملة في العالم… ومعدلات تضخم هناك اتحسنت بوضوح وبقت في نطاق يخلّيهم يقدّموا تيسير محسوب من غير ما يخافوا على العملة.
لكن في مصر… الصورة مركّبة أكتر التضخم لسه مرتفع ومش في المستوى المريح للسياسة النقدية..و الجنيه محتاج دعم وسيطرة على توقعات السوق قبل أي تحريك.. و الفايدة هنا مش بس لمحاربة التضخم… دي كمان أداة لجذب سيولة بالجنيه ومنع الضغوط على العملة.. ومعاهم الملف الخارجي (التدفقات الدولارية .. الاحتياطيات .. الالتزامات) كل ده هيكون عامل حاكم في أي قرار
يعني باختصاراللي بيحكم المركزي المصري مش قرار الفيدرالي… اللي بيحكمه "مصر مش أمريكا".
في الحالة دي… هل في سيناريو إن المركزي يسيب الفايدة ثابتة حتى لو الفيدرالي نزل؟
أيوه طبعا وده الأقرب منطقيًا، لأن تثبيت الفايدة يدي رسالة للأسواق إن المركزي شغال وفق أولوياته الداخلية مش بيركض ورا حد
وفيه سيناريو تاني.. لو المركزي حس إن التضخم فعليًا داخل في اتجاه هبوط مستقر، وإن السوق استوعب تقلبات العملة ومفيش مخاطر مباشرة على الجنيه، ممكن يبدأ خفض تدريجي… بس ده مش بالضرورة يحصل بمجرد ما الفيدرالي خفض.
وخلي بالك… في مرات كتير تاريخيًا الفيدرالي كان بيخفض ومصر كانت بتثبّت أو حتى بترفع، لأن السياق المحلي مختلف.
السؤال الأهم.. هل خفض الفيدرالي في النهاية مصر بتربح منه بطريقة غير مباشرة؟
الإجابة: أيوه نسبيًا لأن خفض الفايدة هناك بيخفّض عائد الدولار عالميًا، فده يقلل الضغط على الأسواق الناشئة ويخلي الاستثمار فيها أكثر جاذبية، وده حاجة إيجابية لمصر. بس ده تأثير غير مباشر… مش زرار بيتدوّس عليه ويغيّر القرار هنا.
