تعليمات جديدة من المركزي.. قفزة في صادرات مصر السلعية.. وأخبار سارة للجنيه المصري
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تعليمات جديدة من المركزي، وقفزة في صادرات مصر السلعية، وأخبار سارة للجنيه المصري.
نبدأ من البنك المركزي المصري اللي أصدر تعليمات جديدة للبنوك بخصوص إصدار شهادات الإيداع البنكية اللي بتُستخدم في تأسيس الشركات أو استكمال سداد رأس المال المصدر جزئي أو كلي، وكمان لزيادة رأس المال.
وجاء في الكتاب الدوري اللي اتبعت للبنوك — واللي مستند على تعليمات سابقة صدرت يوم 24 مارس 2003 — التأكيد على ضرورة التزام البنوك إنها تضيف المبالغ اللي في شهادات الإيداع لحسابات الشركات بنفس عملة القيد اللي موجودة في السجل التجاري والنظام الأساسي للشركة.
وأكد المركزي على الالتزام التام بالتعليمات دي وقت الإفراج عن المبالغ المسجلة في الشهادات، عشان يضمنوا الامتثال الكامل للضوابط اللي بتحكم إصدار شهادات الإيداع واستخدامها في رأس المال.
وبالنسبة للسيولة البنك المركزي المصري يوم الأحد 19 أكتوبر 2025 طرح أذون خزانة محلية بقيمة إجمالية 78 مليار جنيه، نيابة عن وزارة المالية، ضمن جهود الحكومة لتوفير السيولة المطلوبة وتمويل عجز الموازنة العامة.
ونروح لخبر مهم… حجم التجارة المصرية عدى 96 مليار دولار من يناير لحد سبتمبر 2025.. الصادرات تحديدًا تعتبر واحدة من أهم مصادر النقد الأجنبي — مع السياحة وإيرادات قناة السويس وتحويلات العاملين بالخارج.
صادرات مصر السلعية غير النفطية زادت حوالي 21% على أساس سنوي خلال أول 9 شهور من 2025، ووصلت لـ36.64 مليار دولار، بحسب كلام عصام النجار، رئيس هيئة الرقابة على الصادرات والواردات.
والزيادة دي بتيجي في وقت الحكومة المصرية بتحاول تقوّي دور الصادرات في جذب الدولار — وبتستهدف توصل بقيمة الصادرات لـ145 مليار دولار قبل 2030، منهم حوالي 118 مليار صادرات صناعية — بحسب رئيس الهيئة.
الصادرات كانت في 2024 حوالي 44.8 مليار دولار — منهم غير بترولية 39.4 مليار — وده ساعد يعوض جزء من نقص الدولار اللي حصل بعد تراجع إيرادات قناة السويس بسبب هجمات الحوثيين على الملاحة في البحر الأحمر.
ونروح لسوق الصرف… الجنيه المصري حافظ على مكاسبه قدّام الدولار، ومستقر دلوقتي عند أقوى مستوى من تعويم مارس 2024.
الجنيه حالياً بيستفيد من هبوط الدولار عالمياً بسبب الإغلاق الحكومي في أمريكا، ومع صعود عملات رئيسية قدّامه.
كمان داخليًا — مستوى السيولة الدولارية اتحسن، مع مؤشرات قوية إن الاتفاق مع صندوق النقد ماشي بشكل إيجابي.
وبيانات البنك المركزي بتأكد ارتفاع الاحتياطي النقدي لـ49.533 مليار دولار نهاية سبتمبر — مقابل 49.25 مليار نهاية أغسطس — يعني زيادة 283 مليون دولار في شهر واحد.
وقبل كده المركزي أعلن وصول الاحتياطي لمستوى تاريخي جديد في أبريل 2025 — وعدّى حاجز 48 مليار لأول مرة — ومن يومها الاحتياطي بيزيد بشكل مستمر.
ونختم بخبر إيجابي…
وزارة الكهرباء والطاقة المتجددة — ممثلة في الشركة المصرية لنقل الكهرباء — سدّدت حوالي 3.55 مليار جنيه من مستحقات المستثمرين في قطاع الطاقة المتجددة خلال الربع التالت من 2025.
المدفوعات دي راحت لشركات خاصة، منهم محطات مجمع بنبان للطاقة الشمسية في أسوان. وقيمة المستحقات للربع التالت زادت 10% — يعني حوالي 355 مليون جنيه — مقارنةً بالربع التاني.
ومستحقات الشركات بتتغير حسب حجم الإنتاج:
في الصيف بتوصل لـ1.3 مليار جنيه شهريًا وفي الشتاء بتنزل لنحو 900 مليون جنيه بسبب انخفاض الإشعاع الشمسي.. ونفكّر إن الحكومة المصرية بدأت برنامج تعريفة التغذية للطاقة المتجددة سنة 2014.
