المرحلة التانية من مشروع "ديارنا" للإسكان المتوسط جاهزة للطرح.. والأسعار بتبدأ من 15,800 جنيه للمتر
وزارة الإسكان راجعة من جديد بطرح قوي لمشروع ديارنا للإسكان المتوسط
المشروع اللي كسب شهرة كبيرة من أول مرحلة، دلوقتي داخل على المرحلة التانية بمساحات مختلفة تناسب كل الأسر، ونظام سداد طويل المدى يوصل لـ7 سنين.
التقديم هيكون خلال أيام عن طريق منصة مصر العقارية الرسمية، واللي ناوي يحجز لازم يكون جاهز من دلوقتي.
وزارة الإسكان والمرافق والمجتمعات العمرانية أعلنت استعدادها لطرح جديد لمشروع ديارنا للإسكان المتوسط في كل المدن الجديدة تقريبًا، ضمن المرحلة التانية من أكبر طرح سكني على مستوى الجمهورية.
والمساحات متنوعة وتقدر تختار منها اللي يناسبك.
من 104 متر لحد 154 متر، علشان تناسب العائلات الصغيرة والكبيرة كمان.
أما عن الأسعار، فهتختلف حسب المدينة:
القاهرة الجديدة: 20,000 جنيه للمتر.
حدائق أكتوبر: 18,900 جنيه للمتر.
العبور الجديدة: 18,700 جنيه للمتر.
مدينة بدر: 18,300 جنيه للمتر.
العاشر من رمضان: 18,100 جنيه للمتر.
مدينة السادات: 17,500 جنيه للمتر.
برج العرب الجديدة: 17,700 جنيه للمتر.
بني سويف الجديدة: 16,800 جنيه للمتر.
طيبة الجديدة: 16,000 جنيه للمتر.
غرب قنا: 15,800 جنيه للمتر.
سوهاج الجديدة: 16,500 جنيه للمتر.
ناصر الجديدة: 16,000 جنيه للمتر.
المنيا الجديدة: 16,900 جنيه للمتر.
يعني فيه بدائل كتير تناسب كل الإمكانيات.
وبالنسبة لأنظمة السداد .. علشان تحجز، لازم تدفع 200 ألف جنيه جدية حجز + 1000 جنيه رسوم تسجيل لا ترد
بعد كده، بتستكمل 20% من تمن الوحدة خلال شهرين من إخطارك، وده بيشمل 1% مصاريف إدارية + 0.5% لمجلس الأمناء.
وعند الاستلام بتدفع 10% كمان ووديعة الصيانة.
أما باقي المبلغ (70%) فبيتسدد على 3 أو 5 أو 7 سنين بأقساط ربع سنوية، وبفايدة البنك المركزي وقت الدفع + 2% إضافية.
القسط الأول بيبدأ بعد 3 شهور من استلام الشقة، ولازم تقدم الشيكات المؤجلة قبل التسليم.
ولو اتأخرت عن السداد، بتتحسب غرامة بفائدة البنك المركزي + 2% + 0.5% مصاريف تحصيل.
يعني الطرح الجديد من مشروع ديارنا فرصة كويسة جدًا للي بيدور على شقة متوسطة بس في موقع محترم وبنظام سداد مرن.
المشروع بيجمع بين جودة البناء، ومواقع مميزة، وتقسيط طويل المدى، والأسعار لسه في المتناول مقارنة بالمشاريع التانية.
ولو ناوي تقدم، خليك جاهز وجمع أوراقك، لأن الطرح هيبدأ خلال أيام من خلال منصة مصر العقارية الرسمية.
