مفاجأة جديدة في سوق الصاغة.. يا ترى تشتري دهب ولا تبيع؟
يا تري اللي بيحصل في سوق الدهب ده سببه إيه؟.. الدهب اللي بقاله شهور مابيبطلش صعود... فجأة، وفي ظرف كام ساعة بس، نشوفه بينزل بالمنظر ده؟ 100 دولار أو 150 دولار هبوط في الأونصة.
هل دي نهاية أسطورة الصعود التاريخي للدهب؟ يا ترى خلاص الموجة خلصت وبدأت عملية بيع كبيرة؟ ولا إيه السر ورا الهبوط المفاجئ ده اللي خلى عيار 21 في مصر لوحده يخسر أكتر من 100 جنيه في يوم واحد؟
من كام يوم بالظبط، الدهب كان بيسجل أرقام قياسية ماحدش شافها قبل كده. الأونصة العالمية كانت بتحوم حوالين الـ 4400 دولار تقريباً... والكل كان بيراهن إننا رايحين للـ 4500 والـ 5000 دولار قريب جداً. كل المؤشرات كانت بتقول كده.. لان فيه توترات مستمرة بين القوى الكبرى، وخصوصاً أمريكا والصين، ودايماً الدهب هو الملاذ الآمن وقت المشاكل.
كمان فيه عمليات شراء جنوني من البنوك المركزية.. الصين وبنوك تانية كتير بقالها شهور بتشتري كميات ضخمة من الدهب بشكل غير مسبوق في تاريخها، وده طبعاً بيزود الطلب جدا.
مع توقعات بخفض الفايدة على الدولار وهروب المستثمرين للدهب كملاذ آمن.
وسط كل الأسباب دي.. ليه حصل الهبوط؟ ليه الأونصة نزلت فجأة من القمة التاريخية بتاعتها، وسرّعت انخفاضها لحد ما وصلت لمنطقة الـ 4200 دولار؟
الأسباب الحقيقية للهبوط.. الهبوط ده كان ليه سببين رئيسيين واحد فني والثاني أساسي.
السبب الفني والأكثر شيوعاً.. عمليات جني الأرباح .. الدهب بعد ما بيوصل لقمة تاريخية زي الـ 4400 دولار، بتكون مكاسب الناس اللي اشترت من تحت، ضخمة جداً. فبيبتدي بعض كبار المستثمرين يبيعوا جزء من اللي معاهم عشان يحققوا الأرباح دي. البيع الكبير ده بيعمل "ضغط بيعي" بينزل السعر شوية.
والسبب الأساسي والمهم جداً.. انتعاش الدولار الأمريكي وعوائد السندات.. في الساعات اللي فاتت، لقينا إن الدولار الأمريكي بدأ يسترد عافيته بشكل ملحوظ، وده حصل مع ارتفاع في عوائد سندات الخزانة الأمريكية.
نيجي لأهم سؤال.. هل الهبوط ده دليل على نهاية الصعود؟ ولا مجرد استراحة محارب؟
الحقيقة، معظم التحليلات بتقول إن الهبوط ده هو تصحيح فني... مش انقلاب للاتجاه. لأن الاتجاه العام مازال صاعد.. لسه فيه قلق جيوسياسي، ولسه البنوك المركزية بتشتري دهب بكميات كبيرة. مكاسب الدهب من أول السنة لحد دلوقتي تجاوزت الـ 60%، وده رقم ضخم. التصحيح ده بيعتبره المحللين "مرحلة تنفس" قبل الصرخة اللي جاية.
يعني نقدر نقول إن السوق حالياً بيواجه "إنهاك سيولة" بعد موجة صعود قوية، وده بيخليه محتاج إنه "يصحح" أو "ياخد نفسه" شوية قبل ما يكمل الصعود التاريخي بتاعه.
حد ممكن يسال ويقول يه اللي المفروض أعمله لو معايا دهب أو بفكر اشتري؟
لو بتشتري عشان استثمار طويل الأجل.. معظم الخبراء بيقولوا إن كل تراجع في السعر هو فرصة شراء، لأن الاتجاه العام لسه صاعد. الدهب دايماً بيحمي فلوسك من التضخم.
أما بقا لو بتشتري مضاربة ..هنا لازم تكون حريص جداً، لأن السوق بيواجه تقلبات حادة جداً، وممكن تخسر وتكسب بسرعة. البيع هنا ممكن يحصل لو فشل الدهب إنه يرجع يكسر منطقة المقاومة اللي سابها ورا ظهره.
طب لو معاك دهب؟ الأغلبية بتنصح بالاحتفاظ بيه، وماتبيعش بخسارة دلوقتي، لأنه الأرجح إنه هيرجع يعوض تراجعه ويكمل صعوده.
