بحواجز خرسانية.. تخصيص حارة للأتوبيس الترددي على الدائري
اللي بيحصل دلوقتي على الطريق الدائري.. مش مجرد تطوير، دي خطوة جديدة بتغيّر شكل المواصلات في القاهرة الكبرى!
وزارة النقل خصصت حارة مرورية معزولة بالكامل للأتوبيس الترددي الكهربائي، من نزلة قليوب لحد أكاديمية الشرطة، في الاتجاهين.
حارة مخصوصة.. مفصولة عن باقي الطريق بحواجز خرسانية، عشان تمنع أي عربية من الدخول فيها، بعد ما الناس كانت بتستغل الحارة دي خلال الأيام اللي فاتت.
الخطوة دي هتخلي الأتوبيس يوصل في مواعيده بالظبط، من غير تأخير، حتى لو الطريق زحمة أو متوقف.
يعني مواعيد ثابتة، تشغيل منظم، وتجربة نقل حديثة وآمنة.
المرحلة الأولى من المشروع بطول ٣٥ كيلومتر، وبتضم ١٤ محطة منها عدلي منصور، بهتيم، المرج، مؤسسة الزكاة، وطريق السويس.
كل محطة مصممة تخدم آلاف الركاب يوميًا، والأتوبيسات دي كمان مصنوعة في مصر بالكامل.. بخبرة مصرية وبجودة عالمية.
وده مش آخر المطاف، المشروع الكامل لأتوبيس الترددي BRT هيغطي أكتر من ١١٠ كيلومتر بـ ٤٨ محطة، وهيكون عليه مواقف ومحطات شحن كهربائية رئيسية وفرعية.
حواجز خرسانية، مخارج للطوارئ، ونظام ذكي لتتبع الأتوبيسات لحظة بلحظة.. كل ده عشان الرحلة تبقى أسرع، أنضف، وأدق في المواعيد.
