تتصل بالأقمار الصناعية وفيها منصة قاذفات.. مواصفات مرعبة لسيارة ترامب وسعرها مفاجأة
يا ترى إيه سر عربية الرئيس الأمريكي اللي بياخدها معاه في كل حتة في العالم؟ وليه ما بيركبش غيرها حتى لو راح دول عندها أسطول عربيات رئاسية أفخم وأغلى؟ وليه العربيات اللي من النوع ده بيتقال عليها “الوحش”؟
العربية دي اسمها كاديلاك وان، بس الكل بيسميها “ذا بيست” أو الوحش.. ودي مش مجرد عربية رئاسية… دي حصن متنقل على أربع عجلات.. كاديلاك هي اللي بتصنعها مخصوص للرئيس الأمريكي، وتم الكشف عنها لأول مرة سنة 2018.. ومن يومها بقت رمز للقوة والأمان في أي زيارة رئاسية أمريكية.
تخيل كده إن الباب الواحد فيها وزنه زي باب طيارة بوينج 757.. سُمكه حوالي 8 بوصات ومدعم بطبقات من الصلب والتيتانيوم والألومنيوم والسيراميك.. عشان كده محدش يقدر يخترقها ولا حتى برصاص خارق للدروع.
نوافذها معمولة من خمس طبقات من الزجاج والبولي كاربونات.. تقدر توقف رصاص مضاد للدروع.. والمفاجأة إن اللي بيتفتح منها بس نافذة السواق…وبتفتح 3 بوصات بس لا غير، يعني حوالي 7 سنتي.
أما جسم العربية نفسه، فده قصة لوحده.. الدروع بتاعتها بسمك 5 بوصات من مواد عسكرية مركبة.. والشاسيه مدعوم بألواح فولاذية تحميها من الألغام والانفجارات تحتها.. والإطارات معمولة بخامة الكيفلار…يعني حتى لو الإطارات اتفجرت، العربية تقدر تكمل وتمشي عادي.
الجزء الأمامي فيها فيه كاميرات رؤية ليلية وقاذفات غاز مسيل للدموع.. وفيها نظام دفاعي يقدر يواجه أي هجوم مفاجئ.
وفي شنطتها؟ نظام إطفاء حريق، واسطوانات أكسجين.. وأكياس دم من فصيلة الرئيس نفسه في حالة الطوارئ.
جوه العربية، مقعد الرئيس الأمريكي مزود بخط اتصال مباشر مع نائب الرئيس والبنتاجون.. وفيها كمان أجهزة اتصالات مشفرة وتكنولوجيا بتتحكم في كل حاجة حواليها.
طب سعر السيارة الوحش دي كام ؟ المعلومة دي مش معلنة رسميًا، بس التقديرات بتقول إن سعرها بيقارب الـ1.5 إلى 2 مليون دولار.
لكن الحقيقة إن التكلفة الحقيقية مش في العربية نفسها.. التكلفة في القافلة اللي بتمشي معاها.. تخيل إن لما الرئيس الأمريكي يسافر لأي دولة، بيسافر معاه أسطول كامل من العربيات دي،وبيتنقلوا بطيارة نقل عسكرية ضخمة مخصوص اسمها C-17 Globemaster!
يعني حتى لو راح أقصى الشرق أو نص أفريقيا،العربية دي لازم تكون معاه…مفيش حاجة اسمها يركب عربية البلد المضيف، الأمان الأمريكي لازم يبقى أمريكي الصنع والمواصفات.
وطبعًا مش أي حد في العالم عنده عربية زي دي.. غير الرئيس الأمريكي ونائبه في بعض الأحيان… حتى زعماء الدول الكبرى زي بريطانيا وفرنسا ما عندهمش عربية بالمواصفات دي.. يمكن أقرب حد ليها في التكنولوجيا الدفاعية هي عربية الرئيس الروسي.. بس الوحش الأمريكي تفضل الأعلى حماية في العالم.
وفي زيارة ترامب الأخيرة لشرم الشيخ، الأنظار كلها كانت على العربية دي أول ما وصلت المطار.الناس بصت وقالت: إيه ده؟ دي جاية من أمريكا مخصوص! وأيوه فعلاً، جاية بطيارة شحن ومعاها طاقم أمني مخصوص بيشغلها وبيحافظ عليها.
