ضوابط جديدة لتوفيق أوضاع المشروعات الصناعية المتعثرة.. مصنع مصري يغزو أوروبا باستثمارات 280 مليون دولار.. تفاصيل "صفقة القرن" في الكهرباء
منصات بانكير قدمت النهاردة عدد من التقارير والتحليلات الخاصة في الشأن الاقتصادي والمالي المصري، البداية بتقرير عن ضوابط جديدة لتوفيق أوضاع المشروعات الصناعية المتعثرة.
قال التقرير، إن الحكومة دلوقتي بتبعت رسالة واضحة جدًا لكل المستثمرين: إحنا في ضهركم، مش ضدكم، وده باين في القرار الجديد رقم 358 لسنة 2025، اللي أصدره الفريق كامل الوزير، وزير الصناعة والنقل، واللي هدفه الأساسي دعم المصانع والمشروعات اللي اتعطلت أو واجهت مشاكل.
وأضاف التقرير، أن القرار بيقول لو مشروعك نفذ أكتر من نص الإنشاءات ومعاك رخصة، يبقى ليك مهلة 6 شهور كمان من غير غرامة، ولو لسه مكمّلتش النص أو في مرحلة الرخص، ليك 12 شهر، بس الإعفاء من الغرامة لأول 6 شهور، ولو لسه ماخدتش رخصة خالص، الحكومة هتديك سنة ونص كاملة، وأول 6 شهور إعفاء تام.
وأوضح تقرير بانكير، أن كمان الدولة سمحت ترجع تتعامل على الأرض اللي اتسحبت منك لو لسه فاضية وبنفس السعر الحالي، وده معناه إن الحكومة بتقولك: ارجع كمل بس اشتغل بجد.. واللي عايز يغير النشاط لازم يشتغل سنة كاملة الأول، ومفيش تأجير أو تنازل عن الأرض قبل 3 سنين من التشغيل وسداد التمن بالكامل، يعني من الآخر الدولة بتدي فرص حقيقية للمستثمرين، بس بشرط الجدية، وده جزء من رؤية مصر 2030 لدفع الصناعة وتحويل المصانع المتوقفة لعجلة إنتاج ماشية.
منصات بانكير قدمت تقرير مختلف النهاردة عن مصنع مصري يغزو أوروبا باستثمارات 280 مليون دولار.
قال التقرير، إن شركة مارس ريجلي أعلنت عن توسعات ضخمة في مصنعها بـ السادس من أكتوبر، باستثمارات وصلت لـ 280 مليون دولار من سنة 2023 لحد 2025، وده علشان تخلي المصنع المصري واحد من أكبر 5 مصانع لمارس في العالم.. واللي بيحصل مش مجرد توسعة إنتاج، ده ثقة كبيرة من شركة عالمية في الاقتصاد المصري.
وأضاف التقرير، أن المصنع بقى فيه أحدث خطوط إنتاج، وبيصدر 90% من إنتاجه لأكتر من 50 دولة في أوروبا وآسيا والشرق الأوسط.. يعني "مارس" و"سنيكرز" اللي بتتاكل في باريس أو برلين، ممكن تكون جاية من هنا، من مصر!
وأوضح تقرير بانكير، أن وزير الاستثمار حسن الخطيب، قال إن التوسعات دي نقلة كبيرة في الصناعات الغذائية، وهتوفر فرص شغل كتير، وتشجع شركات تانية تيجي تستثمر بنفس القوة.. غير كده، التوسعات هتزود الطاقة الإنتاجية بشكل كبير، وده معناه صادرات أكتر وميزان تجارة أحسن.. كمان المصنع هيساعد في نقل تكنولوجيا حديثة للسوق المحلي، وده هيأثر على جودة الصناعة في مصر.
وأشار التقرير إلى أن اأهم من كل ده أن "مارس" مش بس بتنتج، دي كمان ماشية مع خطة الاستدامة العالمية، من طاقة متجددة وتقليل انبعاثات.
وحدة أبحاث بانكير قدمت تقرير خاص النهاردة عن تفاصيل "صفقة القرن" في الكهرباء
قال التقرير، إن كل حاجة بدأت في يناير 2025، لما مصر أعلنت صفقة الربط الكهربائي مع الأردن، واللي زودت القدرة لـ2 ميجاواط، بخط طوله 13 كم، ده معناه إن الكهربا بتمشي بين البلدين بسهولة، وبيزود الاستقرار والتعاون وقت الذروة.
وأوضح التقرير، أنه في فبراير، "أميا باور" الإماراتية وقعت واحدة من أكبر صفقات تخزين الكهربا في المنطقة، بإنشاء محطتين ضخمتين: واحدة في بنبان بـ500 ميجاواط/ساعة، والتانية في الزعفرانة بـ1000 ميجاواط/ساعة، يعني مصر مش بس بتنتج، دي كمان بتخزن وتوزع وقت ما تحتاج.
وأضاف التقرير، أنه في مارس، شركة أوراسكوم فازت بعقد عالمي لتطوير محطة في السعودية، بـ2.6 مليار دولار، بتكنولوجيا بتلتقط الكربون. إنجاز بيأكد إن الشركات المصرية بتنافس عالميًا.. ونيجي لشهر يونيو، السد العالي رجع في الصورة بإنتاج 2400 ميجاواط، مع تركيب أول محول جديد بـ52 مليون يورو و226 مليون جنيه، وده ساعد على استقرار الشبكة.
وأشار تقرير بانكير إلى أنه في يوليو، الكل اتكلم عن مشروع أبيدوس بأسوان، اللي بيخزن الكهربا بالبطاريات بسعة 300 ميجاواط/ساعة، بالاعتماد على الطاقة الشمسية، وده بيخلي الكهربا متوفرة حتى بالليل.. أما في سبتمبر، شركة السويدي إلكتريك أعلنت أول محطة ليها في المجر بطاقة 520 ميجاواط، بتشتغل بالهيدروجين بنسبة 30%، وده فتح باب أوروبا للطاقة النظيفة المصرية..وفي نهاية السنة، مصر وقعت مع "أميا باور" لإنشاء 3 محطات بطاريات جديدة ضمن خطة الوصول لـ42% طاقة متجددة قبل 2030.
