خناقة جديدة ممكن تقلب اقتصاد العالم.. إيه اللي بيحصل بين أمريكا والصين؟
هو ايه سر عودة الحرب التجارية بين امريكا والصين من جديد؟ وليه الرئيس ترامب هدد بفرض 100% رسوم جديدة على بكين؟ وإزاي قرار واحد من ترامب ممكن يحرّك أسعار الدهب في مصر كلها؟ هو في إيه بيحصل في العالم؟ وليه كل مرة أمريكا والصين يدخلوا في خناقة.. إحنا اللي بندفع التمن؟
من ساعات الرئيس الأمريكي دونالد ترامب فاجئ العالم بإعلان نار وقال إنه هيبدأ من أول نوفمبر يفرض رسوم جمركية إضافية ١٠٠٪ على الصين، وكمان هيحط ضوابط على تصدير البرمجيات الاستراتيجية ليهم.
طب ايه السبب؟
الصين فرضت قيود "صارمة جدًا" على تصدير المعادن النادرة.. والموضوع ده بالنسبة للولايات المتحدة مش بسيط خالص… لأن المعادن دي تعتبر العمود الفقري لتكنولوجيا العالم دلوقتي من الموبايلات للسيارات الكهربائية لغاية الصواريخ وأنظمة الدفاع.
ترامب كتب على “تروث سوشال” — منصته الخاصة — وقال بالنص: "مش ممكن نسيب الصين تحتجز العالم بخطتها دي.. الرد لازم يكون قوي.. ومن هنا، بدأت شرارة جولة جديدة من الحرب التجارية اللي كنا فكرنا إنها خلصت.
الأسواق الأمريكية طبعًا اتقلبت.. بورصة نيويورك نزلت بشكل حاد، والمستثمرين بقوا في حالة قلق.. لأن أي توتر بين أمريكا والصين بيهزّ الاقتصاد العالمي كله
الاتنين دول ببساطة هما أكبر اقتصادين في العالم، وأي خناقة بينهم معناها اضطراب في التجارة، وفي سلاسل الإمداد، وفي أسعار السلع كلها.
لكن السؤال المهم…إحنا كمصريين إيه علاقتنا بكل ده؟
ببساطة لما أمريكا والصين يدخلوا في حرب تجارية المستثمرين بيجروا دايمًا ناحية الملاذ الآمن اللي هو "الدهب".
فبنشوف سعر الدهب العالمي يطير لفوق.. وطبعًا إحنا في مصر بنتأثر مباشرة، لأن سعر الدهب عندنا مرتبط بالسعر العالمي بالإضافة لسعر الدولار.. يعني لو الدولار زاد، وسعر الدهب في العالم كمان زاد… إحنا بنشوف رقم جديد كل يوم في محلات الصاغة.
ومن بعد إعلان ترامب سعر الأونصة عالمياً بدأ يتحرك لأعلى، والتوقعات بتقول إن لو التصعيد كمل، ممكن نشوف مستويات جديدة للدهب في الشهور الجاية.. يعني اللي بيفكر يشتري دهب لازم يبقى واخد باله جدًا من اللي بيحصل بين واشنطن وبكين.
فيه كمان تأثير غير مباشر…لما التجارة بين أمريكا والصين تتعطل، الأسعار العالمية للسلع اللي بتدخل في التصنيع بتغلى، وده يرفع تكلفة الإنتاج في دول كتير منها مصر.. وده معناه ان التضخم ممكن يزيد والأسعار المحلية تتأثر حتى لو إحنا مش طرف في المعركة.
