زمن الجنيه راجع من تاني.. الدولار يواصل الخسائر والعملة المصرية تحقق أفضل أداء
بقالنا فترة طويلة متعودين إن الجنيه هو الطرف الضعيف في معركة سعر الصرف... لكن دلوقتي المعادلة اتقلبت.. والجنيه كل يوم بيكسب أرض جديدة وبيستعيد جزء كبير من هيبته المفقودة فيا ترى هل التراجع اللي بيحصل في سعر الدولار قدام الجنيه ده هيستمر؟ هل المكاسب اللي بيحققها الجنيه كل يوم دي هتفضل مكملة معانا ؟ وإيه أصلا الأسباب الحقيقية اللي خلت الدولار يسلّم الراية للجنيه بالشكل ده؟ هل هي الصفقات الكبيرة بس؟ ولا فيه حاجة تانية بتحصل في الخفاء؟
عشان نفهم اللي بيحصل دلوقتي في سوق صرف العملات الأجنبية.. لازم نفتكر إيه اللي كان بيحصل قبل كده… احنا عدينا بفترة صعبة كان فيها سعر الدولار بيطير قدام الجنيه في السوق الموازي وده عمل تضخم عالي جداً وأثّر على أسعار كل حاجة.
لكن من كام شهر الأمور بدأت تتغير بشكل جذري.. الجنيه بدأ ياخد نَفَسُه والدولار بدأ يخسر قيمته قدامه يوم ورا يوم. التراجع ده مِش صدفة، لأ... ده مبني على 3 ركائز أساسية خلت ميزان القوة يتقلب أولهم صفقات الاستثمار الكبرى زي صفقة رأس الحكمة اللي جابت سيولة دولارية ضخمة جداً، وكمان الاتفاقيات الاستثمارية التانية زي حزمة الاستثمارات القطرية اللي قيمتها 7.5 مليار دولار.. الفلوس دي لما بتدخل السوق مرة واحدة بتعمل تخمة في الدولار وبيزيد المعروض منه وده بيخلّي سعره ينزل.
كمان لما البنك المركزي أعلن عن سعر صرف مرن وخد الخطوات اللي بيها قدر يقضي تقريباً على السوق السودا للمضاربة كل ده رجّع الثقة في القنوات الرسمية للتعامل بالدولار.. لما مفيش سوق سودا بيسعر الدولار بسعر جنوني سعره بينزل.
زمش بس الصفقات.. كمان عوائد قناة السويس وإيرادات السياحة اللي بتتحسن وتحويلات المصريين اللي عايشين بره كل دي بتجيب دولار مستمر للسوق، وده بيساعد الجنيه إنه يفضل قوي.
طب هل الأداء القوي ده للجنيه هيفضل مكمل؟
الخبراء بيقولوا إن الجنيه لسه عنده فرصة قوية جداً إنه يكمل مكاسبه لكن بشرط أساسي استدامة تدفق الدولار و طالما إن الحكومة بتكمل في سياسة تخارج الدولة من بعض الأصول، وبتفتح الباب للاستثمار الأجنبي المباشر في قطاعات زي الصناعة والسياحة، يبقى تدفق الدولار هيفضل مستمر، والجنيه هيحافظ على قوته أو حتى يزيد وده بيطمن المستثمر الأجنبي اللي بقى يرجع تاني يحط فلوسه في أذون الخزانة والسندات المصرية.
الأداء القوي للجنيه محتاج يتوازى مع استمرار تراجع التضخم.. لو التضخم فضل عالي، القوة الشرائية للجنيه هتتأثر.. كمان لازم نركز على زيادة الإنتاج المحلي وتقليل فاتورة الاستيراد، عشان نضمن إن الطلب على الدولار لـ "استيراد السلع" ميرجعش يزيد تاني ويضغط على الجنيه.
