إزاي مصر تقدر تحقق الاكتفاء الذاتي من اللحوم خلال 5 سنين؟.. خطوات سحرية هتوفر مليون طن سنويا
مصر بتسعى أنها تحقق الاكتفاء الذاتي من اللحوم في 5 سنين بس، بس هل الخطة دي هتنعكس على أسعار اللحمة في السوق ولا هنفضل نحس بالغلاء؟، والفلاح الصغير هيستفيد بجد ولا الاستفادة هتروح بس للمستثمرين الكبار؟، وهل الجاموس المصري بعد تحسين سلالاته هيبقى كفاية يسد احتياجات السوق؟.. والتمويل من البنوك هيفضل متاح وسهل زي ما الوزارة بتقول ولا هنشوف عقبات على أرض الواقع؟
خليني أقولك إن موضوع تحقيق الاكتفاء الذاتي من اللحوم في مصر بقى حديث الساعة، خصوصًا بعد تصريحات وزير الزراعة علاء فاروق اللي أعلن أن خلال 5 سنين مصر هتقدر توصل للاكتفاء الذاتي وتوقف استيراد اللحوم من بره.
النهارده مصر بتستهلك حوالي مليون طن لحوم حمراء في السنة، والإنتاج المحلي بيوصل لـ660 ألف طن، يعني عندنا فجوة بتتغطى بالاستيراد، بس الخطة الجديدة بتقول أننا هنقفل الفجوة دي بخطوات عملية واضحة.
أول حاجة، وزارة الزراعة بتزود إنتاج اللحوم تدريجيًا، وأحدث تقرير بيأكد أن الإنتاج زاد 50 ألف طن السنة دي، ووصل لـ600 ألف طن، وده بيرجع لزيادة أعداد الماشية اللي بقت 8.6 مليون رأس، كمان الوزارة أصدرت أكتر من 13 ألف رخصة تشغيل لمزارع جديدة في الفترة الأخيرة.
بس إيه الخطة اللي الحكومة ماشية بيها؟، أولا مشروع البتلو اللي اتصرف عليه أكتر من 10 مليار جنيه، واستفاد منه 45 ألف مربي، وخلّى أكتر من نص مليون رأس ماشية يتربوا ويتسمنوا، كمان تحسين السلالات الوراثية عشان نطلع لحوم وألبان بجودة وإنتاجية أعلى، كمان الحكومة عملت تكثيف الرعاية البيطرية والتحصينات ضد الأمراض، وسهلت تراخيص المزارع الجديدة وضخ استثمارات في الإنتاج الحيواني.
الحكومة مسكتتش لحد هنا، دي عملت بروتوكولات تعاون مع البنوك عشان التمويل يبقى متاح بشروط سهلة وسداد مريح.
بس ليه الجاموس المصري واخد نصيب الأسد في الخطة؟، وده لأنه بيتحمل الحرارة والرطوبة ومقاوم طبيعي للأمراض وكمان متأقلم مع البيئة المصرية.
وزارة الزراعة بتعمل برامج لتحسين السلالة دي بالخلط والتهجين مع سلالات مستوردة عالية الإنتاجية باستخدام التلقيح الصناعي، وده الهدف منه أننا نطلع سلالات جديدة تتحمل الظروف وتدي إنتاجية أكبر، لأن الأرقام بتقول إن الجاموس المصري زاد من 1.3 مليون رأس سنة 2020 لـ1.5 مليون رأس في 2024، وده دليل إن فيه نمو فعلي.
يعني باختصار، مصر ماشية بخطة متكاملة، وهي تمويل + سلالات محسنة + رعاية بيطرية + مشروعات جديدة، ولو الخطة مشيت زي ما هما بيقولوا، فعلاً خلال 5 سنين ممكن نحقق الاكتفاء الذاتي ونبطل استيراد لحوم من بره، وده معناه أن الفلاح الصغير هيستفيد، والمواطن هيلاقي اللحمة متوفرة بأسعار أحسن، والبلد هتوفر مليارات كانت بتتصرف على الاستيراد.
