الدهب والدولار في اختبار صعب.. ايه اللي هيحصل بعد قرارات الخميس
يا ترى إيه اللي هيحصل في مصر الأيام الجاية بعد قرار البنك المركزي بخفض أسعار الفايدة؟ وإيه تأثيرها القرار على سعر الدولار وأسعار الدهب.. والناس اللي معاها شهادات استثمار هتعمل إيه؟
لما البنك المركزي بيقرر يخفض سعر الفايدة (بمقدار 1% مثلاً زي ما حصل)، ده بيكون مؤشر لسببين مهمين.. السبب الأول.. هو إنه شايف إن التضخم بدأ ينزل وبيتحسن.. والأسعار بدأت تهدى شوية. يعني الحرارة الاقتصادية في البلد بدأت تنزل وده هدف كويس للبلد
السبب التاني وده الأهم لينا.. هو إن البنك المركزي عايز يشجع الناس إنها مَتْحُطش فلوسها في البنوك وتاخد عليها فايدة ثابتة.. هو عايز الفلوس دي تخرج وتشتغل في السوق وتروح للاستثمار وتروح للمصانع تروح للمشروعات الحقيقية.. يعني بيزق السيولة إنها تتحرك.
طالما الفلوس تخرج من البنوك ومَتْجِبش عائد كبير زي الأول... هتروح فين؟
في مصر، الناس عندها 3 وجهات رئيسية للفلوس دي العقار، الذهب، أو الدولار.
طب إزاي قرار المركزي بياثر في سوق الدهب والدولار؟
بالنسبة للدهب القاعدة بتقول كل ما الفايدة تنزل الدهب يرتفع.. لأن المستثمر لما يشوف إن العائد على إيداعه في البنك قل بيبدأ يدور على وعاء استثماري تاني مبيقدمش عائد دوري بس بيحافظ على قيمة الفلوس وبيزيد مع الوقت وده طبعاً هو الدهب.
بس فيه نقطة مهمة جداً لازم نفهمها .. الدهب في مصر مرتبط بشكل رئيسي بالسعر العالمي. الخبراء دايماً بيأكدوا إن الارتفاعات اللي بنشوفها في سوق الدهب المحلي بتكون بسبب صعود أونصة الدهب عالمياً مش بسبب قرار الفايدة المحلي لوحده.
العالم دلوقتي شايف إن البنوك المركزية العالمية كمان ممكن تخفض الفايدة، وده بيقلل تكلفة الفرصة البديلة للاستثمار في الدهب، وبيخليه الملاذ الآمن وقت الأزمات والاضطرابات الجيوسياسية اللي بتحصل في العالم.
طب ايه تاثير خفض الفايدة على سعر الدولار؟
المنطق الاقتصادي بيقول.. لما الفايدة على الجنيه بتنزل المفروض الطلب على الجنيه بيقل وبالتالي ممكن ده يزود الطلب على الدولار.. لكن في الحالة المصرية، القصة مِش بالبساطة دي. الدولار في مصر دلوقتي عنده عوامل دعم قوية بتخليه يحافظ على استقراره، زي تحسن عوائد السياحة وارتفاع تحويلات المصريين اللي عايشين بره.
والمستثمر الأجنبي اللي كان بييجي يحط فلوسه في أذون الخزانة المصرية (الفايدة العالية) دلوقتي ممكن يبدأ يسحب جزء من فلوسه بسبب انخفاض العائد، وده ممكن يضغط على الدولار..
لكن طالما إن فيه استقرار في سعر الصرف الرسمي فالمضاربات بتقل، وده بيخلي تحركات الدولار محدودة لحد ما نشوف تحركات سعر الفائدة في أمريكا.
