أوبر تفرض رسوم جديدة وتبدأ المحاسبة بالدقيقة.. اتأخرت؟ ادفع زيادة!
الأحد 05/أكتوبر/2025 - 04:00 ص
لو متعود تخلي السواق مستنيك تحت شوية .. جه وقت دفع التمن! أوبر أعلنت نظام جديد هيغير اللعبة خالص.
من دلوقتي، كل دقيقة السواق بيستناها بعد وصوله هتتحسب عليك رسوم انتظار!.
وأكتر من كده، لو عديت وقت معين من غير ما تطلعله، السواق من حقه يلغي الرحلة ويطبق عليك رسوم إلغاء
والإلغاء المجاني بقى أول دقيقتين بس من لحظة ما السواق يقبل الرحلة، عشان بعدها أي تأخير هتدفع عليه فلوس إضافية.
أوبر بتقول ان الخطوة دي هدفها يبقى في عدالة واحترام متبادل بين السواقين والركاب.. يعني باختصار: لا سواق يضيع وقته ولا راكب يتأخر من غير حساب!
