باقي علي افتتاح المتحف الكبير
  • يوم
  • ساعة
  • دقيقة
  • ثانية
الجمعة 03 أكتوبر 2025
رئيس التحرير
عمرو عامر
رئيس التحرير التنفيذي
أحمد لطفي
رئيس التحرير
عمرو عامر
رئيس التحرير التنفيذي
أحمد لطفي
أخبار

هل الدولار هينزل لـ 45 جنيه؟.. خبراء يكشفوا السيناريوهات المتوقعة لنهاية 2025

الجمعة 03/أكتوبر/2025 - 04:30 ص
سعر الدولار اليوم
سعر الدولار اليوم

سعر الدولار قدام الجنيه بقى حديث الشارع والمستثمرين الفترة الأخيرة، في ناس متفائلة إن الجنيه ممكن يقوى ويوصل لمستوى 45 للدولار مع نهاية 2025، وفي ناس شايفة إن ده صعب وسط التحديات الاقتصادية والضغوط العالمية، وبين الرأيين، الصورة بتبان معقدة وفيها تفاصيل كتير مرتبطة بالسياسة النقدية، والتدفقات الدولارية، والسوق العالمي.

خلال الشهور اللي فاتت الجنيه المصري حقق أفضل أداء ليه من أكتر من سنة، لما نزل من 51.73 جنيه في أبريل لحد حوالي 48 جنيه، قبل ما يستقر عند 48.10 للشراء و48.20 للبيع في آخر التعاملات.

و الأداء ده فتح باب الجدل: هل ده بداية تعافي مستمر ولا مجرد حركة مؤقتة؟

بنك جولدمان ساكس الأمريكي مثلاً قال إن الجنيه مقيم بأقل من قيمته الحقيقة بحوالي 30%، وده بيخلي فيه فرصة إنه يقوى أكتر، خصوصاً لو استمرت التدفقات الدولارية زي ما هي دلوقتي .. البنك كمان نصح المستثمرين الأجانب يشتروا أذون خزانة مصرية للاستفادة من الوضع الحالي.

ومن ناحيته محمد عبد العال، الخبير المصرفي، أكد إن نظام إدارة سعر الصرف الحالي مرن جداً ومبني على العرض والطلب، وده بيخلي التنبؤ بمستوى معين صعب.

هو شايف إن الجنيه ممكن يفضل في حدود 48 – 49 للدولار بنهاية السنة، مدعوم بتحويلات المصريين بالخارج اللي وصلت لمستويات قياسية، وإيرادات السياحة المرتفعة، واحتياطي نقدي قوي.

لكن حذر في نفس الوقت إن تقوية الجنيه زيادة ممكن تضر قطاعات زي السياحة والصادرات، بجانب وجود ديون خارجية تقيلة وصلت لـ 150 مليار دولار.

أما محمود نجلة، المدير التنفيذي لأسواق النقد بشركة الأهلي لإدارة الاستثمارات، فشايف إن قوة الجنيه مرتبطة بالتدفقات المتنوعة: تحويلات المصريين، السياحة، الصادرات الزراعية، والاستثمارات المباشرة.

هو بيعتبر إن الإدارة النقدية ماشية في مسار بطيء وآمن لنزول الدولار، وده بيخلي التوقع الأقرب إنه يوصل لـ 45 – 46 جنيه مع نهاية 2025 أو بداية 2026، بشرط استقرار الأوضاع، لكنه برضه حذر من أي توترات جيوسياسية ممكن تغير المشهد كله فجأة.

اما سهر الدماطي، نائبة رئيس بنك مصر الأسبق، قالت إن وفرة الدولار في السوق هي العلامة الأبرز دلوقتي، وده انعكس على تراجع سعره، وقالت ان الوفرة دي للاستثمارات الجديدة، وتحسن السياحة، واستمرار تحويلات المصريين بالخارج، كمان السياسة النقدية الأمريكية اللي خفضت الفائدة ساعدت على ضعف الدولار عالمياً، وده رجع صناديق الاستثمار الدولية لمصر.

الدماطي قالت كمان إن التقديرات الدولية بتتراوح بين 44.5 و47 جنيه للدولار في نهاية 2025، لكنها شخصياً بترجح إنه يقفل قريب من 47 لو الأوضاع فضلت مستقرة.

يعني بكل بساطة كده مستقبل الدولار قدام الجنيه لسه مش محسوم: في سيناريوهات بتقول ممكن ينزل لـ 45، وسيناريوهات تانية شايفة إنه هيستقر في حدود 47 – 48 ..  والفرق كله مرهون بقدرة مصر على جذب استثمارات، استمرار التدفقات الدولارية، واستقرار المنطقة من الناحية السياسية والاقتصادية.