أغلى خضار في العالم.. أسعاره تصل لأكتر من 1000 دولار للكيلو
الخضار دايما كان رمز للأكل البسيط والصحي والرخيص.. بس الغريب إن في أنواع معينة من الخضار بقت بتتباع بأسعار خيالية، لدرجة إن الكيلو منها ممكن يتعدى سعر الدهب!
والسبب مش بس الطعم أو القيمة الغذائية، لكن كمان ندرتها وصعوبة زراعتها.. خلونا ناخد جولة مع أغلى أنواع الخضار في العالم واللي أسعارها بتخليها بعيدة عن متناول الناس العادية.
أول وأغلى نوع هو فطر ماتسوتاكي .. الفطر ده بينمو في أماكن محدودة جدًا تحت أشجار الصنوبر في اليابان والصين وكوريا، وسعر الكيلو ممكن يوصل لـ1200 دولار! ده في سنة 2021 اتباع 3 حبات منه بس في مزاد باليابان بـ7594 دولار.
والمشكلة إن زراعته صعبة جدًا وكمان بيواجه خطر الانقراض بسبب دودة غازية .. غير كده، بيتحصد مرة واحدة في السنة وبحساسية عالية للجو وعشان كده الفطر ده مش بس غالي، كمان ليه فوائد صحية كبيرة زي مضادات الأكسدة ومركبات بتساعد في الوقاية من التعب.
النوع التاني هو الكمأة البيضاء .. ودي سعرها ممكن يوصل لـ168 دولار، وبتنمو في إيطاليا تحت جذور أشجار زي البلوط والكستناء، بس رغم ندرتها، إلا إنها مطلوبة جدًا بسبب قيمتها الغذائية العالية.
والدراسات بتقول إنها بتحتوي على بروتين كامل بكل الأحماض الأمينية الأساسية، بجانب الألياف ومضادات الأكسدة، وده بيخليها مكون فاخر جدًا في المطابخ الأوروبية.
نيجي لـ الزعفران .. اللي بيتلقب بـ "الذهب الأحمر"، وسعر الكيلو منه ممكن يتخطى 1000 دولار، وده راجع لإنه عشان تجمع نص كيلو زعفران محتاج حوالي 75 ألف زهرة! والموضوع كله بيتعمل يدوي عشان يحافظوا على خيوط الزعفران الرقيقة، يعني الموضوع مكلف جدا.
كمان عندنا الوسابي ، اللي بيتباع ما بين 70 و250 دولار للكيلو حسب الجودة، ومعظم الناس تعرفه بالمعجون الأخضر الحار اللي بيتاكل مع السوشي، بس الحقيقة زراعته معقدة جدًا لأنه محتاج يتزرع عند مجاري الأنهار في مياه نقية متدفقة، وده بيخلي إنتاجه قليل جدًا.
أما التاتسوي فبيتراوح سعره حوالي 15 دولار للرطل، وهو نوع آسيوي شبه بالسبانخ لكن له طعم مميز، وغني بالكالسيوم والبوتاسيوم وحمض الفوليك وفيتامينات كتيرة، وعشان كده بقى مكون محبوب في السلطات والأطباق الصينية.
الثوم الأسود كمان ضمن القائمة .. وسعره ما بين 10 و20 دولار للرطل، وده مش ثوم عادي، ده بيتعالج ويتعتيق لحد ما لونه يسود وطعمه يبقى حلو شبه الخل البلسمي، اشتهر في آسيا الأول وبعدين انتشر عالميًا، لأنه مش بس طعمه مميز لكن كمان مفيد جدًا للصحة وبيساعد على توازن السكر في الجسم، الوقاية من القلب والكانسر، وكمان الحفاظ على صحة الدماغ.
وأخيرًا عندنا البيبي كورن أو الذرة الصغيرة واللي سعرها من 8 لـ10 دولار للرطل، وده لأنها بتتحصد يدويًا، وحجمها صغير جدًا وممكن تاكلها بالكامل بعكس الذرة العادية، وبتتزرع غالبًا في دول آسيوية ومطلوبة في المطاعم الفاخرة.
يعني من الاخر كده الخضار اللي بنشوفه بسيط ورخيص في حياتنا اليومية، في منه نسخ نادرة وغالية جدًا لدرجة إنها بقت رمز للرفاهية والأكل الفاخر، واللي بيجمعهم سبب واحد: صعوبة الزراعة والندرة اللي خلت الكيلو يتعدى أسعار خيالية.
