أغلى وش في التاريخ.. حكاية قناع توت عنخ آمون اللي حير العالم
من أكتر من 3000 سنة، المصري القديم صنع قطعة ما تتكررش.. قناع مرصع بالذهب والأحجار النادرة، قالوا عليه "أعجوبة فرعونية ما تتقدرش بتمن، لغز حير العلماء بدقته، وسحر السياح بجماله.
قناع توت عنخ آمون" القناع اللي اتحول لرمز الحضارة المصرية كلها، واللي مصنوع بالكامل من دهب نقي وزنه فوق الـ 10 كيلو، ومرصع بأحجار مش موجودة في الطبيعة دلوقتي .. لكن الغموض مش في قيمته المادية.. الغموض الحقيقي في السر اللي وراه: إزاي المصري القديم قدر يصنع حاجة بالدقة دي من آلاف السنين؟ وليه القناع ده بالذات بقى هو أيقونة الحضارة المصرية؟
تخيل إنك واقف قدام قناع طوله نص متر تقريبًا، مصنوع من أنقى أنواع الذهب، وزنه أكتر من 10 كيلو جرام.. كل لمعة فيه بتقول إن الزمن ماقدرش يمحي عبقرية المصري القديم، ده مش مجرد قطعة دهب.. ده "القناع الجنائزي للملك توت عنخ آمون".
القناع ده تم نحته بدقة رهيبة: فوق الجبين، تاج ملكي مزدوج بيضم الكوبرا اللي همز الحماية، والنسر رمز السيطرة على الأرض والسماء.
العيون معمولة من الكوارتز الأبيض والأوبسيديان الأسود، بتدي للقناع نظرة حية تخليك تحس إن الملك بيراقبك.. اما اللحية الذهبية المرصعة باللونين الأحمر والأزرق، رمز الاستمرارية والخلود.
نيجي بقى للتاج .. فهو متزين بأحجار كريمة وزجاج ملون نادر جدًا لدرجة إن العلماء مش قادرين يحددوا مصدر بعض المواد المستخدمة لحد النهاردة.
والأغرب إن القناع مش بس من بره تحفة فنية.. من جواه منقوش عليه 12 سطر من "كتاب الموتى"، نصوص مقدسة، المصريين زمان كانوا بيكتبوها على جدران الجبانات عشان تساعد الراحل في رحلته للعالم الآخر، يعني القناع كان بمثابة "جواز سفر روحي" للملك .. بيحميه ويضمن له الخلود.
ولو متعرفش فـ الملك توت عنخ آمون نفسه رحل صغير جدًا.. حكم حوالي 9 سنين بس ورحل وعمره 18 سنة تقريبًا، يمكن يكون ملك قصير العمر، لكن حظه إنه جبانته اكتُشفت كاملة سنة 1922 على إيد عالم الآثار البريطاني "هوارد كارتر".
وخليني اقولك ان أكتر من 5000 قطعة أثرية اتلقت في الجبانة، أغلبها بحالة ممتازة. لدرجة ان لأول مرة في التاريخ نلاقي جبانة ملكية كاملة ومقفولة من أيام الفراعنة. من يومها، توت عنخ آمون اتحول من ملك مغمور لرمز عالمي للحضارة المصرية.
والقناع الذهبي بقى هو القطعة الأيقونية وسط كل كنوز توت في كل كتاب تاريخ، في كل متحف، في كل فيلم وثائقي عن مصر القديمة .. وده لأنه مش مجرد وجه ملك.. هو رمز لحضارة كاملة سبقت عصرها بآلاف السنين.
والمثير كمان إن علماء الآثار لحد النهاردة بيختلفوا:
إزاي المصري القديم صهر وكون الذهب بالدقة دي؟
إزاي نحت ملامح وش الملك بالواقعية دي من غير أي أدوات حديثة؟
وإزاي قدر يجيب الأحجار النادرة اللي بعضها مش موجود غير في مناطق بعيدة جدًا زي أفغانستان أو شبه الجزيرة العربية؟
بعض العلماء بيوصفوا القناع إنه "أكبر لغز أثري" مش بس لأنه غالي، لكن لأنه بيجسد براعة حضارة كاملة.
النهاردة القناع بيتم التحضير لعرضه في المتحف المصري الكبير في قاعة خاصة مخصصة لتوت عنخ آمون، ولأول مرة هيكون كل مقتنيات الجبانة معروضة في مكان واحد، يعني أي زائر هيشوف القناع وسط الكنز اللي اتدفن مع الملك الشاب.. عرض كامل يبين قد إيه مصر القديمة كانت متقدمة في الفنون والهندسة والروحانيات.
يعني قناع توت مش بس أغلى قطعة آثار في العالم عشان وزنه ذهب.. ده أغلى لأنه بيحكي عن الخلود، عن الإيمان، عن الفن اللي مافيش زمن يقدر يمحيه، ولو وقفت قدامه، هتعرف إن قيمته مش بس في الدهب.. قيمته في الحكاية اللي بيحملها، واللي مخلياه معجزة عايشة لحد النهاردة.
