خطة مصر لتصدير العقار.. إزاي السوق العقاري مرتبط بـ90 صناعة.. وهيدخل مليارات الدولارات
القطاع العقاري في مصر بقى واحد من اهم القطاعات اللي بتقود النمو الاقتصادي.. وده لانه مش قطاع منفصل أو شغال لوحدة.
لكن لان قطاع العقارات مرتبط باكتر من 90 صناعة متنوعة منها الحديد والاسمنت ومواد البناء والدهانات والنجارة وكمان الخدمات المرتبطة بالمرافق والتشطيبات.
وده بيخلي اي نشاط عقاري جديد بيأثر بشكل مباشر على حركة الصناعة والتشغيل وبيخلق فرص عمل كبيرة.
الاجتماعات الاخيرة مع اللجنة الاستشارية للتنمية العمرانية وتصدير العقار ركزت على استغلال الميزة النسبية للسوق المصري اللي بيضم مطورين عقاريين على اعلى مستوى
ومشروعات متنوعة سواء في المدن الجديدة او في المناطق الساحلية واللي اصبحت وجهة مفضلة للشراء من المصريين والاجانب.
كمان تم طرح ملف تصدير العقار كأداة مهمة لجذب العملة الصعبة وزيادة موارد الدولة وده من خلال منصة تصدير العقار اللي بتديرها هيئة المجتمعات العمرانية
وبتوفر نافذة واحدة بتربط المستثمرين والمشترين الاجانب بالجهات المعنية علشان تسهل كل الاجراءات الخاصة بالشراء والتسجيل وده معناه ان السوق المصري بقى عنده منظومة منظمة لتملك العقارات للاجانب.
الاجتماعات كمان ناقشت خطط للترويج للعقار المصري في الخارج خصوصا مع تزايد الطلب على الوحدات في المدن الساحلية وتم التأكيد على البيع بالعملة الاجنبية كوسيلة لدخول موارد جديدة للجهاز المصرفي.
كمان الملف تناول موضوع التسجيل المبدئي للعقارات واللي بيتم بالتنسيق بين الوزارات المعنية لتبسيط الاجراءات سواء للمصريين او الاجانب وده بيساهم في رفع جاذبية السوق العقاري وزيادة قدرته على المنافسة اقليميا ودوليا.
