مفاجأة غير متوقعة في اجتماع المركزي.. إيه اللي هيحصل يوم الخميس الجاي؟
يا ترى إيه اللي هيحصل يوم الخميس الجاي في اجتماع البنك المركزي؟ هل صناع السياسة النقدية هيكملوا سياسة التخفيف النقدي ويخفضوا الفايدة تاني؟
ولا ممكن نشوف قرار مفاجئ يغير التوقعات كلها؟ والأهم.. أيًا كان القرار، إيه انعكاسه على أسعار الدهب، الدولار، وباقي السلع اللي المواطن بيتعامل معاها كل يوم؟
البنك المركزي المصري عنده اجتماع مهم جدًا الأسبوع الجاي.. الاجتماعات دي اللي بتحدد اتجاه الاقتصاد في الفترة الجاية وبتأثر بشكل مباشر على القرارات الاستثمارية على جيوب الناس وحتى على أسعار الأكل والشرب.
طب ايه السيناريوهات اللى ممكن تحصل؟
أول سيناريو تخفيض الفايدة.. ولو المركزي قرر يكمل سياسة التخفيف النقدي وينزل الفايدة، ده معناه إنه شايف التضخم تحت السيطرة، أو على الأقل في اتجاه نزولي.. والخطوة دي هتساعد على تنشيط الاستثمار والإقراض، يعني الشركات تلاقي التمويل أرخص، والمستهلك يقدر يستفيد من قروض أرخص للشراء أو السكن.
لكن في نفس الوقت خفض الفايدة بيخلي أدوات الدين المصرية أقل جاذبية للمستثمر الأجنبي وده ممكن يضغط على الجنيه شوية قدام الدولار.
السيناريو التاني تثبيت الفايدة.. وده الخيار اللي بيعتبره كتير من المحللين "الأكثر أمانًا"، خصوصًا لو لسه فيه ضغوط على الأسعار أو السوق محتاج استقرار قبل أي تحرك جديد…التثبيت بيدي رسالة للأسواق إن المركزي بيراقب الأرقام بدقة، ومش مستعجل في قراراته.. وفي الحالة دي الدولار غالبًا هيفضل في نطاقه الحالي، والدهب هيستنى إشارات عالمية أكتر من المحلية علشان يتحرك بشكل قوي.
السيناريو التالت .. مفاجأة غير متوقعة ..زي رفع الفايدة مثلًا. وده احتمال ضعيف، لكنه موجود.. خصوصًا لو حصلت أي ضغوط مفاجئة على الجنيه أو حصلت قفزات في أسعار السلع الأساسية.
رفع الفايدة هيبعت رسالة للأسواق إن المركزي عاوز يسيطر بسرعة على التضخم ويجذب استثمارات أجنبية في أدوات الدين، لكن ده طبعًا هيزود تكلفة الاقتراض على الحكومة والشركات والأفراد.
طب إيه تأثير أي قرار على الدهب والدولار؟
لو الفايدة نزلت.. غالبًا الدولار هيتحرك لفوق شوية بسبب خروج بعض الاستثمارات الساخنة، والدهب هيميل للصعود كملاذ آمن.. و لو الفايدة اتثبتت.. السوق هيهدى، الدولار هيفضل في نفس نطاقه تقريبًا، والدهب هيتأثر أكتر بالأسعار العالمية وحركة الفيدرالي الأمريكي.. و لو الفايدة ارتفعت فجأة الدولار ممكن يقوى شوية قدام الجنيه بسبب زيادة جاذبية أدوات الدين، والدهب محليًا ممكن يهدى شوية.
أما بالنسبة لباقي السلع.. تأثير الفايدة بييجي بشكل غير مباشر. خفض الفايدة ممكن يحرك الطلب وبالتالي يخلي الأسعار ترتفع لو المعروض محدود. رفع الفايدة بيكبح الطلب شوية وبيهدّي وتيرة ارتفاع الأسعار.
