مفاجآت غير متوقعة عن الدول المسيطرة على إنتاج الدهب.. دولة إفريقية بين الـ 10 الكبار
عمرك سألت نفسك.. هو كل الدهب اللي طلع من باطن الأرض لحد دلوقتي قد إيه؟ ومين الدول اللي ماسكة الريادة وبتطلع أكبر كميات دهب في العالم؟ وإزاي المعدن الأصفر اللي بنشوفه في المجوهرات والسبايك بقى مخزن للقيمة ومقياس لقوة اقتصادية؟
تعالوا نبدأ الحكاية من أولها... لحد نهاية السنة اللي فاتت البشر قدروا يستخرجوا حوالي 220 ألف طن دهب من باطن الأرض لكن المدهش إن 86% من الكمية دي اتسحب خلال آخر 200 سنة بس. يعني معظم الدهب اللي معانا النهاردة طالع من العصر الحديث، مش من العصور القديمة زي ما ناس كتير متخيلة.
ولو عايز تعرف المفارقة... متوسط نصيب الفرد في العالم كله من الدهب مش بيعدي 3 جرامات بس.. يعني لو عندك إنت وأسرتك دهب أكتر من المتوسط ده لكل فرد فأنت رسمي بتعتبر في شريحة الأثرياء.
طيب السؤال المهم.. كل الكميات دي بتروح فين؟
البنوك المركزية لوحدها بتسيطر على حوالي17% من الدهب العالمي اللي قيمته دلوقتي بتتخطى 24 تريليون دولار.
وفي آخر 4 سنين الطلب على الدهب زاد بشكل غير طبيعي.. لأن البنوك المركزية بقت تخزنه بشكل أكبر وصناديق استثمار ضخمة بقت تشتغل عليه كأصل آمن وطبعاً الطلب التقليدي على المجوهرات والحلي .. لكن في نفس الوقت الطلب الصناعي قل شوية رغم إن الدهب دخل في صناعات حساسة زي الإلكترونيات والهواتف الذكية.
نيجي بقى للسؤال الكبير.. مين أكبر 10 دول بتنتج دهب في العالم؟
بحسب بيانات مجلس الذهب العالمي لحد نهاية 2024، الترتيب كالآتي:
الصين على القمة بـ 380.2 طن والملفت إن الصين متزعمة القائمة من 2007 بعد ما عدّت جنوب أفريقيا.
رقم 2 روسيا ب 330 طن ومن بعدها أستراليا 284 طن ثم كندا 202.1 طن وفى المركزي الخامس أمريكا 158 طن. تليها غانا 140.6 طن والمكسيك 140.3 طن وإندونيسيا 140.1 طن وبيرو 136.9 طن وفي المركز العاشر أوزباكستان 129.1 طن.
الملحوظة المثيرة هنا إن جنوب أفريقيا اللي كانت لسنين طويلة بتمسك الصدارة بإنتاج بيتخطى ألف طن سنوياً،نزلت النهاردة لـ 99 طن بس.
طيب لو بصينا على القارات، مين أكتر قارة بتطلع دهب؟
إفريقيا في الصدارة بـ 1010 طن سنوياً.بعدها آسيا بـ 665 طن ومن بعدهم دول الكومنولث وروسيا وأوزباكستان بـ 584 طن ووراهم أمريكا الوسطى والجنوبية بـ 519 طن و أمريكا الشمالية بـ 500 طن وأخيراً أوقيانوسيا بـ 346 طن.
تخيل إن في بعض السنين نص إنتاج العالم كله من الدهب كان بيطلع من القارة السمراء لوحدها.
طيب إيه اللي بيخلي الدهب ليه القيمة دي كلها؟
لأنه مش بس للزينة النهاردة حوالي45% من إجمالي الدهب العالمي متحول لمجوهرات وحوالي 22% سبايك واستثمارات خاصة.. الباقي محتفظ بيه في البنوك المركزية أو داخل المنتجات الصناعية.
