إيه حكاية الأموال الساخنة اللي قالبة الدنيا في مصر.. وليه الناس خايفة من سيناريو 2022؟
يا ترى إيه حكاية الأموال الساخنة اللي كل شوية نسمع عنها دي؟ وليه رئيس الوزراء مصطفى مدبولي اتكلم عنها تاني؟ والأهم من كل ده.. إيه سر الخوف اللي بيسيطر على ناس كتير من رجوع الفلوس دي؟ وليه سيناريو 2022 بيلاحقنا زي كابوس؟
بص يا سيدي، الفلوس السخنة دي زيها زي الضيف اللي بيجي عندك بيتك زيارة سريعة. يجي بسرعة، يقعد كام يوم، ويعمل شغل كويس ومفيد، بس في أي لحظة ممكن يقرر يلم شنطه ويمشي.
الضيوف دول مش أشخاص عاديين، دول مستثمرين أجانب، بيستثمروا فلوسهم في أدوات دين حكومية، زي أذون الخزانة وسنداتها، عشان يستفيدوا من سعر الفائدة العالي اللي بتديهولهم مصر.
القصة بتبدأ لما البنك المركزي المصري بيعمل حاجة اسمها "رفع سعر الفايدة". ده بيخلي الاستثمار في مصر مغري جداً للمستثمر الأجنبي، فيجيلك بأمواله الساخنة دي. الفلوس دي تدخل البلد، وتعمل شغلها تزود احتياطي النقد الأجنبي، وتدعم الجنيه المصري، وتخلق نوع من الاستقرار المؤقت.
بس ليه بنسميها "سخنة"؟
عشان هي ميزتها وعيبها في نفس الوقت... سهولة دخولها وسهولة خروجها. طول ما سعر الفايدة في مصر أعلى، والمخاطر السياسية والاقتصادية قليلة، الفلوس دي بتفضل قاعدة.
بس لو أي حاجة من دول اتغيرت... لو الفيدرالي الأمريكي مثلاً قرر يرفع سعر الفايدة عنده، أو لو حصلت أزمة سياسية أو اقتصادية في مصر... المستثمر ده هيقوم لامم فلوسه بسرعة البرق، ويجري على مكان تاني.
وهنا نيجي لـ "كابوس 2022".. في بداية 2022، ومع بداية الأزمة الأوكرانية، الخوف زاد، والفيدرالي الأمريكي بدأ يرفع الفايدة بسرعة. المستثمرين الأجانب بدأوا يسحبوا فلوسهم من مصر بكميات كبيرة، في وقت قياسي. في كام شهر بس، خرج من مصر حوالي 22 مليار دولار.
والنتيجة كانت كارثية...الجنيه المصري اتعرض لضغوط كبيرة، قيمته نزلت، وأسعار كل حاجة بتزيد بشكل جنوني. عشان كده، لما رئيس الوزراء بيقول إن الفلوس السخنة هترجع تاني، ناس كتير بتقلق. مش لأن الفلوس دي وحشة في المطلق، بالعكس، وجودها ممكن يكون مفيد على المدى القصير، لكن الناس خايفة من تكرار نفس السيناريو، وخايفة من إننا نرجع نعتمد على الفلوس دي كحل دائم لمشاكلنا الاقتصادية.
الدرس اللي اتعلمناه من 2022 هو إن الاعتماد على الأموال الساخنة وحدها، من غير ما يكون عندنا مصادر عملة صعبة تانية مستدامة، زي الصناعة والتصدير والاستثمارات المباشرة طويلة الأجل زي بالظبط ما تكون بتبني بيت على الرمل.
