الدولة بتعمل إيه عشان تأمن مصادر الطاقة للمشروعات والاستثمارات الأجنبية المستهدفة؟.. هنقولك اللي بيحصل في الكواليس
الدولة عندها تحدي صعب في قطاع الصناعة وهو تأمين الطاقة.. ياتري ازاي الحكومة هتوفر الطاقة لكل الصناعات المستهدفة .. وازاي الدولة بتستهدف دخول استثمارات كتيرة للسوق المصري واحنا عندنا أزمة في توفير الكهرباء.
قطاع الصناعة واحدة من القطاعات المهمة جدا في خطة التنمية الاقتصادية اللي الدولة شغالة عليها في الوقت الحالي، خصوصا أن الدولة بقي عندها استراتيجية لزيادة التبادل التجاري وبتستهدف منها تحقيق 140 مليار دولار في 2030، وطبعا الخطة دي قائمة بشكل كامل علي زيادة والتوسع في الصناعة والإنتاج المحلي وتغطية احتياجات السوق من كل المنتجات.
في الوقت اللي الدولة عندها خطة لزيادة وتوطين الصناعات المختلفة برضوا بقي عندنا تحدي تاني وهو تأمين الطاقة اللازمة لقطاع الصناعة، خصوصا أن مفيش صناعة من غير طاقة، والتحركات اللي بتقوم بيها الدولة لجذب الاستثمارات الأجنبية للسوق المصري مش هتدخل مصر الا لو مصر كان عندها استقرار في سوق إنتاج الطاقة، خصوصا أن مفيش مستثمر في العالم هيدخل اي دولة يرمي استثمارات بالملايين وهو مش عارف اذا كانت الاستثمارات دي هتجيب حقها ويحقق مكسب منهما ولا لا .
طيب إزاي الدولة بتفكر تأمين احتياجات قطاع الصناعة من الطاقة؟.
من كام ساعة كان في لقاء لرئيس مجلس الوزراء مع رؤساء تحرير الصحف والمواقع الموجودة في مصر، واتكلم فيه عم كل التحديات وتطلعات الإقتصاد المصري خلال السنين اللي جاية، واحدة من النقط المهمة اللي رئيس مجلس الوزراء اتكلم فيها هيا تأمين الطاقة في مصر لحد 2030، وهنا رئيس الوزراء طمن الناس وقال إن الحكومة آمنت احتياجاتنا من الغاز ومصادر الطاقة التانية لمدة خمس سنين جايين علشان يدعم الصناعة ويقلل استيراد الطاقة.
في الفترة اللي فاتت الدولة بقي عندها التزام في سداد مستحقات الشركات الأجنبية العاملة في مجال الاستكشاف والإنتاج علشان تشجع المستثمرين الجدد وتدعّم الإنتاج المحلي، خصوصا أن مصر عندها هدف رئيسي في الوقت الحالي وهو الحد وتقليل استيراد الغاز الطبيعي والمازوت من الخارج والاعتماد علي الإنتاج المحلي .
وعلي ما الدولة توصل لهدفها النهائي وتوقف استيراد المواد البترولية من الخارج فالدولة مركزة حاليا علي توفير إمدادات بديلة مؤقتة من المواد البترولية للقطاعات المختلفة في مصر، وفي الوقت الحالي الحكومة نجحت في التفاوض وشراء عدد كبير من شحنات الغاز هيكفي احتياجاتنا لحد 2026، وده عبارة عن حل مؤقت لحد ما الإنتاج المحلي يرتفع ونوصل للانتاج المستهدف اللي يغطي كل احتياجاتنا من الطاقة.
خطة مصر لتأمين الطاقة لاحتياجات المواطنين وقطاع الصناعة استهدفت فتح السوق المحلي قدام الاستثمارات الأجنبية والقطاع الخاص للدخول وبناء محطات الطاقة الشمسية وطاقات الرياح وربطها بالشبكة الموحدة للكهرباء .
مصر في الوقت الحالي بقي عندها استراتيجية لزيادة مساهمة الطاقة المتجددة علي الشبكة الموحدة للكهرباء الي 42% مع بداية 2030 ومستهدف كمان زيارتها الي 65% مع دخول عام 2040، وهنا الدولة هتعمد علي زيادة إنتاجها من الكهرباء من محطات الطاقة الشمسية ومحطات طاقة الرياح، ده غير دخول انتاج محطة الضبعة النووية واللي بتعد سلاح مهم لتوليد كهرباء ثابتة على مدى طويل.
