بعد 6 سنين الثبات.. الحكومة تتحرك لزيادة أسعار فاتورة المياه
وزير الري، الدكتور هاني سويلم، كشف إن في نية قريبة لرفع أسعار فواتير المياه، سواء الشرب أو المياه الجوفية المستخدمة في الزراعة.
وقال إن الزيادات دي اتأجلت كذا مرة قبل كده عشان الظروف الاقتصادية، لكن دلوقتي الحكومة بتقول لازم المواطن يشارك في جزء من التكلفة.
آخر مرة اتغيرت أسعار الميه كانت في مايو 2018، وقتها الشريحة الأولى لحد 10 متر مكعب في اليوم ارتفعت من 23 قرش لـ 30 قرش للمتر.
الشريحة التانية (من 10 لـ 20 متر مكعب) زادت من 50 قرش لـ 70 قرش، والشريحة التالتة (من 20 لـ 40 متر) بقت 105 قروش، أما اللي بيستهلك أكتر من 40 متر، المتر عنده وصل 155 قرش.
وبالنسبة للعدادات التجارية: المتر بـ 2 جنيه، وللحكومة 180 قرش، وللمصانع 2.85، والأماكن السياحية 2.90، وكمان فاتورة الصرف الصحي بتيجي حوالي 51% من قيمة فاتورة الميه.
الوزير وضّح إن الهدف مش ربح، لكن تغطية تكاليف رفع الميه والصيانة، خصوصًا مع التوسعات الكبيرة اللي الدولة شغالة فيها في مشروعات الترع ومحطات المعالجة.
المقارنة هنا مهمة.. الميه في مصر من أرخص الأسعار في المنطقة: المتر عندنا بـ 30 قرش في أول شريحة، بينما في الأردن المتر يوصل لأكتر من دولار ونص، وفي أوروبا ممكن يوصل لـ 4 يورو.
السؤال دلوقتي.. الزيادة الجديدة هتكون قد إيه؟.. وامتى هتطبق؟ ده اللي لسه مش واضح؟.. شاركونا بتوقعاتكم في التعليقات.
