أصولنا بتولد فلوس.. مصر رايحة لأفضل 50 دولة في العالم
مصر ضمن أحسن 50 دولة في العالم في الاستثمار والتجارة.. الموضوع مش خيال، دي خطة ماشيين فيها دلوقتي.
الحكومة بتشتغل على 209 إصلاح اقتصادي، وكل واحد فيهم معمول علشان يفتح باب جديد للشغل والاستثمار ويقرّبنا من الحلم ده، طب إيه الإصلاحات دي؟.. وهنستفيد منها إزاي؟.. وهنقدر نحقق ده إزاي ده اللى هنعرفه.
الوزير حسن الخطيب، وزير الاستثمار والتجارة الخارجية، قعد مع وفد البنك الدولي بقيادة عبد العزيز الملا.
والاجتماع كان عن حاجة واحدة: إزاي مصر تمشي بخطة اقتصادية متكاملة، مش ترقيع هنا وحل مؤقت هناك، لا خطة تربط الاستثمار بالتجارة، علشان العجلة تلف بسرعة.
الخطة دي الحكومة بدأت تطبقها حاليًا من خلال رؤية اقتصادية فيها إصلاحات مالية ونقدية وتجارية.
يعني بيشتغلوا على الضرايب، وبيسهّلوا الإجراءات، وبيدعّموا القطاع الخاص، والهدف مش بس نمو النهارده، لكن استدامة للسنين اللي جاية.
وزمان المستثمر كان يتعب بين الورق والرسوم من كل جهة. دلوقتي الخطة إن كل ده يتجمّع في منصة رقمية موحّدة.
عندك 389 ترخيص من 41 جهة حكومية اتجمّعوا في مكان واحد.. ولسه فيه "منصة الكيانات الاقتصادية" اللي هتخلّي أي مستثمر يخلص كل حاجة أونلاين.
يعني من الآخر: الموضوع يبقى شباك واحد، مش عشرين شباك.
مش بس كده مصر بتستعد لتقرير البنك الدولي “Business Ready”، واللي بيقيس جاهزية أي بلد للأعمال.
واتعمل تحليل لفجوات الأداء، وتم تجهيز 209 إصلاح اقتصادي علشان نقفز لقدّام.
ومن النتائج اللي حصلت فعلاً: زمن الإفراج الجمركي نزل من 16 يوم لـ 5.8 يوم، وفي خطّة ينزل لـ يومين آخر السنة.. يعني البضاعة هتدخل وتخرج أسرع، والتاجر مش هيتأخر ولا يخسر.
كمان فيه برنامج جديد لرد أعباء الصادرات — البرنامج ده مش واحد لكل الناس، لأ.. متفصّل حسب كل قطاع تصديري.
والهدف: نشجّع الصناعات اللي فيها تعقيد ومكوّن محلي أكبر، فنزوّد القيمة المضافة ونكسب أسواق جديدة.
ولأول مرة كمان، مصر عملت سياسة تجارية وطنية واضحة، يعني التوجه معروف: فتح أسواق، تنويع صادرات، واندماج في سلاسل القيمة العالمية.
مش بس كده مصر كمان اختارت 13 قطاع اقتصادي علشان تروّج للاستثمارات فيهم: 8 قطاعات جاهزين دلوقتي، و5 لسه محتاجين شوية إصلاحات قبل ما يلمعوا.
والصندوق السيادي كمان بيلعب دور مهم في استغلال أصول الدولة وتحويلها لثروة حقيقية للأجيال الجاية.
الطريق طويل، بس الخطوات واضحة، مصر دلوقتي مش بتفكر في ترقيع، لكن في خطة كبيرة اسمها: 209 إصلاح، هدفها توصلنا لأفضل 50 دولة في العالم.
ولو اتنفذت بالجدية اللي ماشية بيها الحكومة، هنشوف استثمار أوسع، تجارة أقوى، وشغل أكتر للناس.. يعني ببساطة مصر بتجهّز لنقلة كبيرة، واللي جاي أحلى بإذن الله.
