حدث اقتصادي لمصر في 2050 للتخلص من الدين العام.. شوف إيه اللي بيحصل
مصر أخذتها تحدي وهتتخلص من الدين العام في وقت قياسي .. ياتري اية اللي بتعمله مصر علشان تتخلص من الدين العام.. ومصر مستهدفة تسدد كام من ديونها الخارجية مع نهاية 2050.
الدولة المصرية أخذت قرار مهم جدا وهو التخلص من قيود صندوق النقد الدولي، وخلاص مش هيكون في تعاون بين الحكومة المصرية وصندوق النقد الدولي بعد نهاية 2026، وكمان الحكومة حطت خطة لحد 2050 علشان تسدد 55% من ديونها.
طيب إزاي مصر هتسدد الرقم، وآية هيا المصادر اللي هتعتمد عليها مصر علشان تحقق الرقم ده؟
في الوقت الحالي الدولة بقي عندها خطة اقتصادية للاقتصاد المصري اسمها السردية الوطنية، والسردية دي فيها 3 سيناريوهات لخفض نسبة الدين بحلول 2050 لـ55% من نسبة الدين العام بشكل كامل.
السردية الوطنية للتنمية الأقتصادية بتستهدف رفع معدل النمو لـ8% بحلول 2050، وده هيحصل عن طريق استهداف تحسين كفاءة إدارة الدين، وخفض عجز الميزان التجاري، وتسريع الإصلاحات لتحقيق 14.9 مليار دولار في 2030 .
الدولة بتستهدف من خطة التنمية الاقتصادية 2030، زيادة قيمة الصادرات السلعية علشان توصل لـ100 مليار دولار بحلول 2030 وفق سيناريو الإصلاحات مقابل 80% في السيناريو الحالي، ومستهدف زيادة ايرادات الصادرات لـ 175 مليار دولار بحلول 2050.
الحكومة كمان بتستهدف الوصول بصافي الاستثمار الأجنبي المباشر لـ 100 مليار دولار في 2050 وفق سيناريو الإصلاحات، وكمان مستهدف تحقيق استثمارات هتوصل قيمتها لـ24.6 مليار دولار في 2030 مقابل 20.5 مليار دولار في السيناريو الحالي.
السردية الوطنية للتنمية الاقتصادية بتستهدف زيادة عدد السائحين إلى 28 مليون سائح في 2030 و50 مليون سائح في 2050 وزيادة مساهمة السياحة في الناتج المحلي الإجمالي إلى 4.7%، والأرقام دي هتتحقق في ضوء تصميم وتنفيذ استراتيجية قايم علي خطة تسويق شاملة للترويج لوجهات ومنتجعات مصر السياحية، ونسبة النمو المستهدفة هتكون مرتبطة بالطاقة الفندقية المتاحة في مصر، وتحسن المناخ الاستثماري، وتوافر الأراضي اللازمة للاستثمار السياحي .
الدولة في الوقت اللي فاتت بدأت مفاوضات مع عدد كبير من الدائنين واللي لهم فلوس عند الدولة المصرية علشان يحولوا جزء من ديونهم الخارجية إلي استثمارات في السوق المصري، وده حصل مع دولة من أهم الدول اللي لها ديون عند مصر وهيا الصين، واللي وافقت علي تحويل ديونهم لاستثمارات في السوق المصري، وخلال الشهور اللي فاتت مصر استقبلت وفد من كبري الشركات الصينية لدراسة المجالات الاقتصادية المتاحة في مصر.
لازم نعرف أن الصين بتعد في الوقت الحالي واحدة من اعلي الدول اللي لها استثمارات في السوق المصري خصوصا في المنطقة الاقتصادية لقناة السويس، ودخلوا بشكل كبير في عدد كبير من المجالات في السوق المصري خصوصا المجالات المتعلقة بالطاقة المتجددة والنظيفة.
