من قلب قاعدة جوية في السعودية.. شركة مصرية تنفذ مشروع عملاق بـ8 مليارات جنيه
من قلب مصر، شركة عملاقة قدرت تسيب بصمتها في أكتر من 15 سوق دولي.. مشروعات بمليارات الجنيهات والدولارات، وصفقات ضخمة في مجالات البنية التحتية والطاقة.
آخر إنجاز؟ عقد جديد في السعودية بقيمة 600 مليون ريال، بما يعادل 8 مليار جنيه مصري.
الصفقة دي مش بس بتأكد قوة الشركة.. لكن كمان بتطرح سؤال مهم: إزاي وصلت للمكانة دي؟ وبتشتغل فين؟ وليه الكل بيتكلم عنها؟.. خليكم معانا عشان نعرف الحكاية.
شركة بتروجيت المصرية، واحدة من أكبر الأذرع الهندسية في الشرق الأوسط، أعلنت مؤخرًا عن توقيع عقد في المملكة العربية السعودية بقيمة 600 مليون ريال سعودي، يعني 8 مليار جنيه مصري، لتنفيذ مشروع ضخم داخل قاعدة الملك سعود الجوية.
المشروع بيشمل توصيلات بنية تحتية متكاملة، من كهرباء، ومياه، وصرف، وشبكات حماية، وبتروجيت داخلة المشروع مع تحالف من شركتين سعوديتين كبار: الفنار وعصام قباني.
بس دي مش أول مرة بتروجيت تشتغل برا… الشركة موجودة حاليًا في أكتر من 15 دولة، من الخليج لإفريقيا لأوروبا، وده بيعكس قوة تنافسية غير مسبوقة لشركة مملوكة للدولة، لكنها بتشتغل على مستوى عالمي، سواء في جودة التنفيذ أو حجم العمليات.
من أبرز الدول اللي شغالة فيها:
السعودية، الإمارات، العراق، الجزائر، سلطنة عُمان، الكويت، ليبيا، أنجولا، موزمبيق، كرواتيا، والكونغو.
في سنة واحدة، نفذت مشاريع بقيمة تعدّت 80 مليار جنيه.. والتعاقدات الجديدة اللي وقّعتها خلال 2024 وصلت لـ112 مليار جنيه، 60% منها خارج مصر.
والمفاجأة؟ إجمالي المشروعات المخطط تنفيذها لحد 2028 يوصل لحوالي 215 مليار جنيه، في مجالات متنوعة ما بين النفط والغاز، البنية التحتية، خطوط الأنابيب، الصناعات الثقيلة، والبتروكيماويات.
وعلى المستوى المحلي، بتروجيت ليها دور محوري في تنفيذ عدد من المشروعات القومية العملاقة، منها في العاصمة الإدارية، ومحور تنمية قناة السويس، ومحطات الكهرباء، ومشروعات الهيدروجين الأخضر، وكل ده بيعزز مكانتها كمقاول عام رئيسي معتمد لدى عدد كبير من الشركاء الدوليين.
وبالرغم من التحديات الاقتصادية العالمية، قدرت بتروجيت تحافظ على قدرتها التشغيلية، وتزود حجم تعاقداتها الخارجية، وده بيترجم مباشرة في دعم الاحتياطي النقدي الأجنبي وزيادة تدفقات العملة الصعبة للبلد.
النجاح الأخير في السعودية مش مجرد صفقة.. ده تأكيد على إن بتروجيت مش بس اسم كبير محليًا، لكن كمان قوة مصرية هندسية بتنافس عالميًا.
والسؤال دلوقتي.. هل نشوف قريب شركات تانية مصرية بتعيد نفس النموذج وتغزو أسواق جديدة؟
