يقترب من 5000 جنيه.. متى تتراجع أسعار الذهب في مصر
بعد زيادات كبيرة في الأسعار ، والارقام القياسية اللي وصلت لها، ياتري أمتي الأسعار هتنزل تاني.. ومتوقع سعر الجرام ينزل لكام .. وهل هيكون في ارتفاعات جديدة في المستقبل في أسعار الذهب.
كل الخبراء قالوا إن 2025 هيا سنة الذهب، واللي استثمر في فلوسه في المعدن الأصفر حقق مكاسب مفيش بعدها، خصوصا أن أسعار كل الحركات حققت مكاسب كبيرة لأصحابها، ووصلت لارقام قياسية موصلتش لها في التاريخ، وكل ده حصل في وقت الأوعية الادخارية التانية الموجودة في مصر سواء كانت شهادات ادخارية أو عقارات حصل فيهم خسائر كبيرة.
من بداية 2025 وتحديدا من وقت وصول الرئيس الأمريكي دونالد ترامب الي حكم البيت الأبيض والعالم كله بيشهد تغيرات اقتصادية وسياسية غير مسبوقة، والتغيرات دي أثرت علي سعر ومستقبل الدولار في العالم كله، وبقي في تخوف دولي من الورقة الخضراء، وده اللي خلي اغلب البنوك المركزية حوالين العالم تأخذ قرار بتحويل جزء كبير من احتياطاتها النقدية الي ذهب.
طيب اللي بيحصل في أسعار الذهب دلوقتي وآية اللي جاي في المستقبل؟
أسعار الذهب حاليا مرتفعة وبشكل كبير وده لأكثر سبب أولهم إستمرار التوترات الجيوسياسية والاقتصادية واللي مخليه في تخوف كبير بين الدول ولها تبعات كتيرة علي البورصة الدولية، وفي عدد كبير من السلع أسعارها زادت وبشكل كبير، وتأني سبب هو الاجتماع المرتقب للبنك الفيدرالي الأمريكي لحسم أسعار الفائدة وكل التوقعات بتأكد أنه هيكون في خفض جديدة لأسعار الفائدة، وده هيخلي الإقبال علي الاحتفاظ بالدولار يقل بدرجة كبيرة وهيكون التوجه الأكبر هو الاحتفاظ بالذهب، وعلشان كده في تحليلات كتيرة لأكبر البنوك حوالين العالم رفعت توقعاتها عن أسعار الذهب بسبب توقعات خفض الفائدة.
في حالة وجود قرار من البنك الفيدرالي الأمريكي بخفض أسعار الفائدة فده هيعمل ضعف جديد للدولار الأمريكي، ولما الدولار يضعف أسعار الذهب بتزيد، خصوصا أن العلاقة بينهم عكسية، ولما سعر الدولار بتنزل يكون المستثمرين توجههم الاول مختصر في علي شراء الذهب وده بيرفع الطلب علي المعدن الأصفر ده بيكون عامل من أهم عوامل زيادة الأسعار.
الاحداث الإقليمية والدولية اللي موجودة دلوقتي خلت في اقبال كبير من البنوك المركزية علي شراء الذهب كجزء من احتياطاتها النقدية، وفي نفس الوقت بتقلل الاعتماد على الدولار أو السندات، وده عامل مهم من العوامل اللي رفعت السعر العالمي للذهب.
طيب هل أسعار الذهب مرشحة للزيادة ولت الانخفاض خلال الوقت اللي جاي ؟.
أسعار الذهب واحدة من الحاجات اللي مربوطة بالاحداث الإقليمية والدولية، وطول ما الأحداث دي موجودة ومشتعلة بالاسعار مرشحة للزيادة، لكن بعد كل زيادة بتحصل حاجة إسمها إعادة تصحيح وفيها الأسعار بتخفض بس مش بشكل كبيرة وبعدها بتحصل زيادات جديدة وهكذا.
