سباق المليارديرات على عرش الأغني في العالم.. من يتفوق؟
الجمعة 12/سبتمبر/2025 - 06:30 ص
في يوم واحد.. التاريخ اتقلب.. رجل الأعمال الأمريكي لاري إليسون، مؤسس "أوراكل"، انتزع لقب أغنى رجل في العالم من إيلون ماسك.
إزاي حصل ده؟
سهم "أوراكل" طار 40% في جلسة واحدة، أكبر قفزة من سنة 1992، ومعاها القيمة السوقية للشركة قربت من التريليون — تحديدًا حوالي 950 مليار دولار.
إليسون اللي ماسك 41% من الشركة، ثروته وصلت لـ 393 مليار دولار، وده خلى الفارق بينه وبين ماسك حوالي 11 مليار لصالحه.
الأرقام مش هنا وبس.. الشركة كشفت عن التزامات مستقبلية بحوالي 455 مليار دولار، يعني قفزة بـ359% عن السنة اللي فاتت.
كمان بتتوقع عوائد متصاعدة من البنية التحتية السحابية: من 18 مليار دولار في 2026 لحد ما توصل لـ 144 مليار دولار على المدى الطويل.
ومع استثمارات عملاقة بتوصل لـ35 مليار دولار السنة دي في مراكز البيانات، "أوراكل" مشية بخطوات تقيلة ناحية قمة جديدة.
