بتوصل لـ400 جنيه.. أسعار عرائس حلاوة المولد

فاكرين زمان وإحنا صُغيرين أول ما ييجي المولد النبوي.. نستنى العروسة والحصان اللي بيجيوا مع الحلاويات.. كانت ليهم فرحة لوحدها، فرحة بالمولد.. وفرحة بألوان العرائس السكر، واللمة حوالين الحلويات.

السنة دي، أسعار عرايس المولد مستقرة، بتبدأ من 40 جنيه وتوصل لـ400 طبعًا حسب الأحجام والأماكن اللى بتبيعها، مفيش زيادات عن السنة اللي فاتت. 
لكن رغم الاستقرار ده.. الإقبال ضعيف.

ليه؟ عشان الناس مركّزة دلوقتي على مصاريف المدارس من كتب وكراسات وزي مدرسي، ودي بقت أولوية في ظل دخول الأسر اللي مش بتزيد.

الموضوع مش جديد، السنة اللي فاتت كان في نفس الركود، التضخم بيضغط، والسلع اللي مش أساسية بقت مش في أولويات الشراء، حتى لو كانت عروسة حلاوة.