بعد نقل مكتب العائلة من لندن.. ناصف ساويرس ينقل “أوراسكوم كونستراكشن” للإمارات
شركة "أوراسكوم كونستراكشون" المملوكة لرجل الأعمال ناصف ساويرس أعلنت إنها هتبدأ تنزل أسهمها في سوق أبوظبي المالي من يوم 11 سبتمبر اللي جاي.
الشركة قالت في بيان بعتته للبورصة المصرية النهارده إن أسهمها هتفضل زي ما هي في البورصة المصرية عادي.. ومش هيحصل أي حاجة للتداول بتاعها.
وللتوضيح.. ناصف ساويرس كان نقل المكتب الاستثماري بتاع العيلة من لندن لأبوظبي في 2023.
الخطوة دي بتيجي بعد ما الجمعية العمومية للشركة وافقت في 12 أغسطس اللي فات على نقل القيد الرئيسي للشركة من بورصة "ناسداك دبي" لسوق أبوظبي للأوراق المالية.. وكمان نقل المقر الرئيسي من مركز دبي المالي لمركز أبوظبي العالمي.
الملياردير المصري ناوي ينقل مجموعة "إن إن إس" بتاعته لسوق أبوظبي العالمي.. ومن هناك.. المجموعة بتخطط إنها تشتري حصص كبيرة في شركات مختلفة.. خصوصاً في أوروبا والشرق الأوسط وأمريكا الشمالية.
