مصر عاصمة أثرياء شمال أفريقيا.. 14.8 ألف مليونير و7 مليارديرات
في قارة ضخمة زي أفريقيا، اللي بسكنها أكثر من 1.5 مليار نسمة، مين تتوقع العاصمة اللي بتتربع على عرش الأثرياء؟
لو قولت جنوب أفريقيا صح.. بس في المركز الأول شمال القارة، العاصمة مش الدار البيضاء.. ولا الجزائر.. العاصمة هي القاهرة.
مصر بتحتضن أكبر عدد من الأثرياء في شمال أفريقيا، والرقم مش صغير أبدًا، إحنا بنتكلم عن عشرات الآلاف من المليونيرات، و7 مليارديرات بيشكلوا قمة الهرم المالي المصري.
طب توزيعاتهم إيه وحجم ثرواتهم قد إيه.. طبقًا لأحدث تقرير صادر عن شركة الاستشارات العالمية Henley & Partners، مصر احتفظت بلقب عاصمة الأثرياء في شمال أفريقيا لغاية يونيو 2025، بعدد مليونيرات وصل إلى 14.8 ألف شخص، يعني اللي بيملكوا مليون دولار أو أكتر.
صحيح العدد ده أقل من نهاية 2023 اللي كان فيه حوالي 15.6 ألف، لكن برضه لسه مصر متربعة على القمة في شمال القارة، والتانية على مستوى أفريقيا كلها بعد جنوب أفريقيا.
أما الفئة الأعلى شوية، اللي بيسموهم "السنتي مليونيرات" ودول اللي معاهم 100 مليون دولار فأكتر من الأصول القابلة للاستثمار، فعددهم في مصر نزل بسيط لـ 49 شخص بدل 52.
بينما المليارديرات المصريين فضلوا ثابتين عند 7 مليارديرات.
ولو قارنا الصورة دي مع دول شمال أفريقيا:
المغرب في المركز التاني بـ 7500 مليونير، و35 سنتي مليونير، و4 مليارديرات.
الجزائر في المركز التالت بـ 2700 مليونير، و7 سنتي مليونير، وملياردير واحد.
يعني بكل وضوح، مصر هي العاصمة الحقيقية للأثرياء في شمال أفريقيا.
طيب مين أبرز الأسماء على الساحة المصرية دلوقتي؟
تقرير بلومبرغ الأخير كشف إن ترتيب الأغنى اتغير شوية.. نجيب ساويرس بقى على القمة بثروة حوالي 9.20 مليار دولار، متفوق بفارق بسيط على أخوه ناصف ساويرس اللي ثروته حوالي 9.15 مليار دولار.
بعدهم بييجي رجال أعمال عيلة منصور:
محمد منصور: حوالي 3.4 مليار دولار.
يوسف منصور: حوالي 1.4 مليار دولار.
ياسين منصور: حوالي 1.2 مليار دولار.
دول الخمس أسماء الأبرز في قائمة الملياديرات مع قائمة الـ 7 في مصر.
المثير للاهتمام إن مصر رغم أي تغييرات اقتصادية لسه محافظة على مكانتها كوجهة جاذبة للطبقة الثرية، وده بيرجع لقوة السوق المصري، حجمه الكبير، وفرص الاستثمار اللي بيقدمها.
لكن الأهم كمان إن الحفاظ على الصدارة بيجي مع استقرار أكبر في الاقتصاد الكلي، وخلق فرص جديدة تشجع ظهور مليونيرات جدد من ريادة الأعمال والتكنولوجيا، مش بس من العائلات الكبيرة المعروفة.
في النهاية، مصر مش بس "أرض الحضارة"، لكنها كمان النهارده عاصمة الأثرياء في شمال أفريقيا، ولسه المستقبل ممكن يضيف أسماء جديدة للقائمة مع استمرار السوق في النمو والانفتاح.
