أسعار حلاوة المولد 2025.. شوف الفرق بين العادي والمتوسط والفاخر
أسعار حلاوة المولد 2025 هتمشي إزاي السنة دى، وهل هنشوف زيادات كبيرة زي السنين اللي فاتت ولا الموضوع هيكون أهدى؟
معروف احنا كمصريين العادة عندنا إن كل بيت لازم يجيب شوية حلاوة مولد سواء من المحلات الشعبية أو من العلب الجاهزة في السلاسل الكبيرة، عشان كده بيتابعوا الأسعار كل سنة.
ومن هنا، رئيس شعبة السكر والحلوى بغرفة الصناعات الغذائية قال إن في استقرار كبير في الأسعار السنة دي، والسبب الأساسي هو إن أسعار السكر انخفضت مقارنة بالسنين اللي فاتت، وده خلا الضغوط تقل شوية على أسعار حلاوة المولد.
لكن برضو في زيادات طفيفة بتحصل طبيعي عشان في مكونات تانية بتدخل في الصناعة وأسعارها بتتغير زي المكسرات والمواد الخام، ومع كده التوقعات إن الأسعار بشكل عام تفضل مستقرة ومناسبة لحد كبير.
نخش على الأسعار نفسها، وهي ان العلب التقليدية أسعارها من 200 ل 800 جنيه حسب الحجم والمحتوى، وفي عبوة صغيرة بحوالى 150 جنيه والعلبة المتوسطة بتبدأ من 500 جنيه وعلبة مولد بايتس 420 جنيه.
أما بقر في المحلات التجارية الكبيرة، فعلبة برايم 10 قطع ب 100 جنيه، وعلبة كنوز إيتوال 32 قطعة ب 320 جنيه، وعلبة إيليت 38 قطعة ب720 جنيه وعلبة المعز 69 قطعة ب 1700 جنيه، وفي حاجة اسمها صينية VIP فيها 34 قطعة ب 2700 جنيه، أما بقى صندوق المحروسة 44 قطعة ب4200 جنيه، وصندوق المحروسة 78 قطعة صغير بـ 2950 جنيه، والعلب الـ14 قطعة أسعارها بين 111 و222 جنيه، والعلب الفاخرة بتبدأ من 295 جنيه لحد 2600 جنيه للعلبة الكبيرة.
يعني نقدر نقول إن 2025 جاب معاه خبر كويس للمستهلك، وهو ان الأسعار مستقرة ومش هتحس بزيادات مرهقة زي السنين اللي فاتت، واللي عايز يجيب حاجة بسيطة هيلاقي، واللي نفسه في علبة فاخرة يلاقي، والأكيد إن الإقبال هيزيد الأيام الجاية مع اقتراب المولد النبوي الشريف.
واللافت السنة دي كمان، إن الإقبال مش بس على العلب الفاخرة لكن كمان على الحلاوة الشعبية اللي لسه محتفظة بروح المولد، زي السمسمية والحمصية والفولية ودي أسعارها لسه في المتناول وبتخلي كل بيت يقدر يشارك فرحة المولد بطريقته.
وكالعادة، العروسة والحصان لسه واخدين مكانهم في قلوب الأطفال رغم إن معظمهم دلوقتي بيشوفهم كرمز أكتر من إنهم لعبة، لكن وجودهم على الترابيزات في البيت بيدي جو خاص للمولد وبيفكرنا إن المناسبة مش مجرد حلوى وأسعار لكنها فرحة ولمة وذكرى جميلة بتتجدد كل سنة.
