قفزة صادرات الملابس المصرية.. مصر ناوية على إيه في السوق العالمية
إيه السر في ان صادرات الملابس المصرية تعمل قفزة 25% في نص السنة دي 2025، هل ده معناه إن مصر ممكن تبقى رائدة في الصناعة دي قريب، وإيه انعاكس ده على حياة المواطن العادي؟ .. خلينا نفهم الحكاية مع بعض.
في الحقيقة، صادرات الملابس الجاهزة سجلت حوالي 1.6 مليار دولار في أول 6 شهور من السنة دي 2025، مقارنة ب 1.28 مليار دولار نفس الفترة السنة اللي فاتت، وده رقم كبير جدا بيأكد ان في طفرة بتحصل في القطاع ده.
ونقدر نقول إن السر ورا النمو ده هز إن في خطة واضحة من المجلس التصديري للملابس الجاهزة والمنسوجات، اللي بيستهدف يوصل بالصادرات ل12 مليار دولار بحلول 2031، والخطة دي معتمدة على تطوير المصانع وكمان تحسين الجودة والتوسع في أسواق جديدة زى إفريقيا وآسيا.
والموضوع مش بس أرقام، لكن كمان في استراتيجيات واقعية، زي مثلا إننا نوسع شبكة المستوردين في أسواق تقليدية زي أوروبا وأمريكا، وكمان نفتح أسواق واعدة زي الهند وفيتنام، غير كده في تعاون مع جهاز التمثيل التجاري علشان نعرف الفرص التصديرية المتاحة بره ونستغلها بأفضل شكل.
والأهم كمان، إن السوق الإفريقية بقت هدف مهم جدا لمصر، لأنه سوق نامي وطلبه على الملابس الجاهزة بيزيد كل شوية، وده يفتح قدام المنتج المصري فرصة انه يبقى منافس رئيسي مش بس إقليمي لكن عالمي كمان.
ولو بصينا لقدام، هنلاقي إن في مقومات ممكن تخلي مصر تبقى رائدة فعلا في صناعة الملابس الجاهزة، زي مثلا عمالة مدربة بأسعار تنافسية وكمان موقع جغرافي قريب من أوروبا وأفريقيا وبردو اتفاقيات تجارية بتدّي ميزة تفضيلية للصادرات المصرية.
ونقدر نقول ان الزيادة دي في الصادرات معناها فرص شغل جديدة لآلاف العمال والفنيين في المصانع، لأن كل ما الإنتاج يزيد كل ما فرص الشباب في إنه يلاقي وظيفة ثابتة بمرتب كويس تكبر، وده كمان بيخلي شركات الملابس تستثمر أكتر في تدريب العمالة عشان يحافظوا على الجودة العالية اللي بتخلي المنتج المصري مطلوب بره.
كمان، نمو الصادرات معناه دخول عملة صعبة أكتر لمصر وده بينعكس على الاقتصاد كله لأن الدولار اللى بييجي من التصدير يساعد في استقرار الجنيه، وده مع الوقت بيقلل الضغوط على الأسعار، بعني الموضوع مش بس مكسب للمصدرين لكنه كمان مكسب للمواطن اللي عايز يشوف استقرار في السوق.
وفي الآخر، نقدر نقول ان النمو الكبير ده مش خطوة وانتهت لكنه بداية لطريق ممكن يخلي الملابس الجاهزة واحدة من الصناعات اللي مصر تنافس بيها بقوة على المستوى العالمي.
