مفاجأة في أسعار الدهب مع ترقب خفض الفائدة الأمريكية
هو إيه اللي بيحصل في سوق الدهب اليومين دول، وليه الكل مترقب قرار الفيدرالي الأمريكي بخفض الفايدة وإيه علاقته بالمعدن الأصفر، هل ده معناه إن أسعار الدهب هتولع تاني ولا لأ؟
في مصر، أسعار الدهب استقرت بشكل ملحوظ وده بعد ما فقدت جزء من مكاسبها الأسبوع اللي فات، عشان كده عيار 21 قفل عند 4540 جنيه للجرام، وده نفس مستوى الإغلاق السابق تقريبا، أما العيارات التانية زي عيار 24 وصل ل 5189 جنيه، وعيار 18 سجل 3891 جنيه والجنيه الدهب بقى بحوالى 36 ألف و320 جنيه.
أما عالميا، فالأوقية سجلت 3336 دولار بعد ما نزلت الأسبوع اللي فات بنسبة 1.8%، وده بسبب ارتفاع التضخم في أمريكا اللى خلا الأسواق تعيد حساباتها بخصوص خفض الفايدة.
ونقدر نقول ان الترقب الأكبر دلوقتي لاجتماع الفيدرالي وكلمة جيروم باول في ندوة جاكسون هول، فالأسواق عايزة تعرف إذا كان فيه خفض قريب للفوايدة ولا الفيدرالي هيستنى شوية عشان يراقب التضخم، لكن التوقعات دلوقتي مختلفة لان محللين زي "سيتي جروب" شايفين إن الدهب ممكن يوصل ل 3500 دولار للأوقية خلال 3 شهور جاية خاصة مع الأوضاع الجيوسياسية، وكمان "جولدمان ساكس" متوقعين إنه يلمس 3700 دولار بنهاية 2025 لو الدولار كمل نزوله.
ونقدر نقول ان المؤكد إن قرارات الفيدرالي الفترة الجاية هتكون نقطة فاصلة لمستقبل أسعار الدهب، وده لأن أى خفض للفوايدة بيقلل جاذبية الدولار والسندات وبيخلي المستثمرين يجروا على الدهب كملاذ آمن، يعني بالمختصر، لو الفايدة اتخفضت، الأسعار ممكن تشتعل، ولو استنوا شوية فالسوق هيكمل فى حالة ترقب.
كمان، لازم نعرف إن ارتفاع أسعار الدهب عالميل مأثر على الإقبال عليه كمعدن للزينة خاصة في دول زي الهند والصين اللي كانوا أكبر مستهلكين للدهب، ومع غلاء الأسعار فالطلب على المشغولات هناك قل، لكن في المقابل بقى فيه اتجاه أكبر لشراء الدهب كأداة استثمار وحفظ قيمة.
ومن ناحية تانية، خبراء السوق بيأكدوا إن الفترة الجاية هتكون مليانة تذبذبات، يعني هنشوف صعود وهبوط سريع في الأسعار مع أي تصريح أو قرار جديد من الفيدرالي أو مع أي توترات سياسية عالمية، وده بيخلي المستثمرين في حالة حذر يعني مستنيين يشوفوا هل الدهب هيكمل كملاذ آمن ولا هيفاجئنا بحركات عكس التوقعات.
وفي الآخر، نقدر نقول إن اللى بيحرك أسعار الدهب مش بس العرض والطلب المحلي، لكن كمان السياسة النقدية الأمريكية وأي تطورات عالمية كبيرة، لكن المؤكد إن الدهب هيشهد تغيرات كبيرة في الأسعار خلال الفترة الجاية.
