حققنا أكثر من 2 مليار جنيه.. فوائد كتيرة للاقتصاد المصري من زيادة الإيرادات الضريبية

مصر بدأت ثورة علشان تغيير شكل الاقتصاد المصري وحققنا رقم مهم جدا من الإيرادات الضريبية.. يا ترى إيه حكاية ارتفاع الإيرادات الضريبية.. وآية الفائدة اللي بترجع علي الاقتصاد المصري من زيادتها.
من كام ساعة كان في اجتماع مهم جدا بين الرئيس عبد الفتاح السيسي رئيس الجمهورية مع رئيس مجلس الوزراء الدكتور مصطفى مدبولي وأحمد كجوك وزير المالية علشان يناقشوا اخر القضايا والتحديات اللي بتواجه الاقتصاد المصري وخطط تطوير وإعداد الخطط اللازمة للنهوض بالاقتصاد الوطني وبناء برنامج اقتصادي قوي قادر علي مواجهة كل الصدمات الخارجية.
الاجتماع اللي عقده رئيس الجمهورية مع رئيس مجلس الوزراء ووزير المالية اتكلموا فيه الإيرادات الضريبية واللي حققت أعلى معدل نمو خلال السنين اللي فاتت بنسبة 35%، وحاليا بتسجيل 2.204 تريليون جنيه، وده بفضل حزم التسهيلات الضريبية وتوسيع القاعدة الضريبية اللي طرحتهم الحكومة خلال الفترة اللي فاتت واللي كانت نقطة مهمة جدا في تعزيز الثقة والتعاون مع مجتمع الأعمال.
طيب إيه هيا اسباب النمو اللي حصل في الإيرادات الضريبية وفائدتها علي الاقتصاد المصري ؟

جزء كبير من التحسن الملحوظ اللي حصل في الأداء الضريبي بيرجع لجهود توسيع القاعدة الضريبية واللي استهدفت جذب ممولين جدد بشكل طوعى، وحل المنازعات بشكل ودى، وإستخدام الوسائل التكنولوجية والمنظومات الإلكترونية، وإنشاء وحدة التجارة الإلكترونية، وتطوير النظام الضريبي وتطبيق منظومة ادارة حالات المخاطر الضريبية، والخطوات اللي قامت بيها الحكومة لتحسين القدرات الإدارية لمصلحة الضرائب والاجراءات التنظيمية واستحداث نظام اجراءات رد الضريبة على القيمة المضافة، وتصميم نظام جديد بيتميز بالسرعة والسهولة، وتوحيد وتبسيط وتنشيط وتحسين الخدمات الضريبية، والتوسع في التسهيلات الضريبية، وجهود إعادة الثقة في الممولين من خلال تخفيف الأعباء على الممولين، وتبسيط الإجراءات، وتعزيز الشفافية وتقليل فرص التهرب وتحسين دقة التحصيل.
لازم نعرف أن زيادة الإيرادات الضريبية معناها أن في موارد أكتر بتدخل خزينة الدولة، وده بيساعد الحكومة على تقليل الاعتماد على القروض، وتقليل العجز في الموازنة العامة، ولما الدولة يبقى عندها دخل ثابت من الضرائب، بتقدر تخطط بشكل أفضل للإنفاق العام بدون ما تضطر للاستدانة الخارجية، وزيادة الإيرادات الضريبية الدولة هتستخدمه في تمويل قطاعات مهمة زي الصحة والتعليم والمرافق العامة وتمويل مشروعات قومية زي الطرق والكباري، وتطوير الموانئ، والمدن الجديدة، وده بيخلق فرص عمل وبيحرك الاقتصاد.
جزء كبير من تحسن الإيرادات الضريبية الدولة بتوجه لدعم برامج الحماية الاجتماعية زي برامج تكافل وكرامة والدعم التمويني والتأمين الصحي الشامل، وده بيخلي الفئات الأكثر احتياجا تقدر تعيش بكرامة ويحصل نوع من التوازن الاجتماعي بيحفز الاقتصاد غير الرسمي على الاندماج في الاقتصاد الرسمي للدولة وده بيكون سبب مباشر في زيادة الإيرادات وبيوفر حماية للعاملين فيه.
الحكومة في الوقت الحالي عندها هدف وخطة مهمة جدا علشان تضمن زيادة الإيرادات الضريبية وكمان تزودها وده هيحصل من خلال تطبيق نظام ضريبي عادل، وميضغطش على المواطن محدود الدخل، ويبقى فيه شفافية في كيفية استخدام الضرائب.