قرار مهم جدا للحكومة.. تراجع كبير في مبيعات السيارات.. وضوابط جديدة لتخصيص وتسعير الأراضي الصناعية
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، قرار مهم جدا للحكومة، تراجع كبير في مبيعات السيارات، وضوابط جديدة لتخصيص وتسعير الأراضي الصناعية.
والبدياة من مجلس الوزراء اللى وافق على تعديل قانون حقوق الأشخاص ذوي الإعاقة، وبكده بقى من حق أي شخص يستورد عربية معفاة من الجمارك كل 15 سنة، بدلًا من 5 سنين زي ما كان الأول.
وحسب بيان رسمي من الحكومة المصرية، التعديلات الجديدة بتقول إن: "العربيات ووسائل النقل اللي بيستخدمها الأشخاص ذوي الإعاقة هتكون معفاة من الجمارك وضريبة القيمة المضافة، وده يكون لعربية واحدة بس كل 15 سنة. بس بشرط، يكون اللي بيستوردها هو الشخص صاحب الإعاقة نفسه، سواء كان كبير أو قاصر. والعربية تكون للاستعمال الشخصي ليه، ويسوقها هو بنفسه، أو سواقه الخاص، أو حد من قرايبه من الدرجة الأولى، أو ولي أمره لو كان قاصر أو حالته الصحية مش بتسمح له يسوق."
التعديل الجديد كمان بيقول "ممنوع تتصرف في العربية دي بأي شكل من الأشكال لمدة خمس سنين من تاريخ الإفراج الجمركي عنها، سواء بالبيع أو التنازل أو أي طريقة تانية، وممنوع تستخدمها في غير الغرض اللي اتخصصت عشانه. بس لو لا قدر الله الشخص توفى خلال الخمس سنين دول، ورثته يقدروا يتصرفوا فيها بعد ما يدفعوا نص الضريبة الجمركية وضريبة القيمة المضافة."
ولسه مكملين في مجلس الوزراء، اللي وافق في اجتماعه اللي فات، برئاسة الدكتور مصطفى مدبولي، على مشروع قرار بيحط قواعد وآليات واضحة لتخصيص وتسعير الأراضي الصناعية في كل حتة في مصر، وده طبعًا عشان يشجع الاستثمار الصناعي ويستفيدوا من الأراضي دي بأفضل شكل.
القرار بيقول إن تخصيص الأراضي الصناعية هيتم من خلال "منصة مصر الصناعية الرقمية" أو من خلال طلبات تتقدم مباشرة للوزير المختص بالصناعة، سواء بنظام التمليك أو حق الانتفاع، وده طبعًا حسب نوع النشاط الصناعي اللي عايزينه.
القرار كمان شدد على ممنوع تغير النشاط اللي الأرض اتخصصت له أو تبيعها أو تتنازل عن حق الانتفاع فيها، إلا بعد ما تحقق شروط معينة. أهمها إن المشروع يكون شغال بجد لمدة 3 سنين على الأقل، وتكون سددت تمن الأرض كله، وتاخد موافقة من الهيئة العامة للتنمية الصناعية. وسمح القرار إنك تحول من نظام حق الانتفاع لنظام التمليك بعد 3 سنين من التشغيل الفعلي، بس بشرط إنك تدفع فرق سعر الأرض بالسعر التجاري الجديد.
ونروح لسوق العربيات... أسعار العربيات المستعملة والجديدة نزلت جامد الفترة اللي فاتت، وده بسبب زيادة التصنيع المحلي وتوطين صناعة العربيات في مصر واهتمام الرئيس السيسي بتعميق الصناعة دي، والتعاون مع القطاع الخاص والشركات العالمية عشان نزود نسبة المكون المحلي والصادرات.
أسامة أبو المجد، نائب رئيس شعبة السيارات باتحاد الغرف التجارية، قال في تصريحات صحفية إن أسعار العربيات الجديدة والمستعملة نزلت حوالي 25%، ومتوقع إنها تنزل تاني في النص التاني من السنة دي وتوصل لـ 30%.
وأوضح أبو المجد إن من أول السنة دي تم الإعلان عن إنشاء 7 مصانع، وقبل نهاية السنة هيوصلوا لأكتر من 10 مصانع، وبيقول إن سنة 2025 هي سنة تحول حقيقي لتوطين صناعة العربيات.
وضاف أبو المجد إن فيه خطة عامة لتوطين صناعة السيارات مع الصين، وده بسبب إن حجم الصادرات الصينية لأمريكا قل حوالي 6 أضعاف.
ونختم بخبر مهم... مصر والأردن عززوا الشراكة الاقتصادية بينهم بتوقيع اتفاقيات ومذكرات تفاهم عشان يعملوا مشاريع مشتركة بقيمة 500 مليون دولار، وده حسب كلام مسؤول حكومي.
الإعلان ده جه في اجتماع اللجنة المشتركة بين البلدين في العاصمة الأردنية عمان، برئاسة رئيس وزراء مصر والأردن.
المسؤول قال إن مذكرات التفاهم دي شملت قطاعات زي الغاز الطبيعي، والربط الكهربائي، والبنية التحتية، وصناعة الأدوية، والنقل والمواصلات، وتكنولوجيا المعلومات، ومناطق لوجستية، والإسكان، والسياحة، وحماية المستهلك، والتنمية المحلية، والتعاون العلمي، ومكافحة الآثار، والمشتريات الحكومية.
المسؤول كمان أشار لاتفاق الجانبين على إنهم يضاعفوا حجم التبادل التجاري ويوصلوه لـ 2 مليار دولار في السنة، بعد ما كان مليار دولار في 2024 و 867 مليون دولار في 2023. الصادرات المصرية كانت 752 مليون دولار، والواردات كانت بـ 255.8 مليون دولار، وده حسب بيانات الجهاز المركزي للتعبئة العامة والإحصاء.
