وداعا لقطع النور.. مصر تستثمر 11 مليار جنيه لإنشاء محطات كهرباء جديدة.. إيه الحكاية؟
يا ترى الـ11 مليار جنبه دي كفاية فعلًا عشان تحل مشكلة انقطاع الكهرباء في الصيف؟.. وهل المحطات الجديدة هتدخل الخدمة في المعاد اللي قالوا عليه، ولا هنسمع كلمة “تأجيل” تاني؟.. وهل الخطة دي هتغطي كل المحافظات، ولا أماكن معينة؟
الشركة المصرية لنقل الكهرباء عاملة خطة تقيلة جدًا، وبتحط رقم كبير على الترابيزة، 11 مليار جنيه استثمارات.. وده عشان تعمل محطات كهرباء جديدة وكمان تقوية البنية التحتية للكابلات في المناطق اللي الحمل فيها ضعيف، عشان الناس هناك تلاقي كهرباء مستقرة.
الخطة دي مش هتطول، لأن المحطات الجديدة هتدخل الخدمة قبل صيف 2026، يعني في ظرف سنتين تقريبًا، الموضوع مش هزار، خصوصًا إن مصر دلوقتي بتواجه ضغط كبير جدًا على شبكة الكهرباء بسبب استهلاك عالي مع ارتفاع درجات الحرارة.
يمكن أنت نفسك لاحظت الفترة اللي فاتت إن في مناطق كتير، زي في الجيزة الشهر اللي فات، الكهربا كانت بتقطع أكتر من مرة، وده بسبب الشبكة مش قادرة تشيل الحمل في عز الحر.. الموضوع بدأ بالفعل، الأسبوع اللي فات بس، الشركة خلصت محطة محولات البدرشين كمرحلة أولى، بتكلفة أكتر من مليار جنيه.. والمحطة دي هدفها إنها تأمن الكهرباء لمناطق البدرشين، والعياط، وأبو النمرس، والحوامدية في محافظة الجيزة، المناطق دي كانت بتعاني من انقطاعات متكررة سواء في الصيف أو الشتاء.
وطبعًا باقي الـ11 مليار مش هيتصرفوا مرة واحدة، لسه فيه حوالي 10 مليارات هيتوزعوا على مراحل لحد صيف 2026. الخطة تشمل إنشاء موزعات كهرباء في مناطق زي منشأة القناطر، والمنوات، وأبو النمرس، والعياط… وكلهم في الجيزة برضه.. لكن هنا فيه مشكلة في بعض الأماكن مش لاقيين أراضي كفاية عشان يبنوا عليها محطات أو أكشاك محولات، زي منطقة هضبة الأهرام، اللي محتاجة أراضي بشكل عاجل عشان الشبكة هناك ما تقعش.
خد بالك، إحنا بنتكلم في وقت البلد فيه مناطق اتعرضت لانقطاعات طويلة جدًا الفترة اللي فاتت، وصلت لـ 72 ساعة متواصلة في بعض الأماكن! وده بسبب أعطال مفاجئة في محطات المحولات أو تلف في الكابلات، وطبعًا الحرارة العالية ساعدت في المشكلة.
توقعات الصيف الجاي بتقول إن استهلاك الكهرباء ممكن يوصل لـ 40 ألف ميجاوات يوميًا عشان كده الحكومة في موازنة 2025-2026 خصصت 75 مليار جنيه لدعم الكهرباء، ومعاها زيادة متوقعة في استهلاك الغاز بنسبة 9%.
مش بس وكده، ده رئيس الوزراء الدكتور مصطفى مدبولي كان وعد قبل كده إن صيف 2025 هيعدي من غير انقطاعات، عكس صيف 2024 اللي شهد أزمات بسبب نقص الغاز لمحطات التوليد.
كمان فيه خطة لتوفير 20 مليار جنيه لصيانة محطات الكهرباء السنة المالية الجديدة، بزيادة 67% عن السنة اللي فاتت، لأن جزء كبير من التشغيل كان بيعتمد على المازوت والسولار بدل الغاز، وده بيكلف أكتر.
وفي الآخر، الشركة المصرية لنقل الكهرباء قدامها تحدي كبير، خاصة في الأماكن اللي مفيهاش أراضي كفاية لبناء محطات جديدة، لكن لو الخطة مشيت زي ما هم بيقولوا، الشبكة الوطنية هتكون أقوى وأكتر استعداد لأي ضغط في الصيف."
