قرار ترامب المفاجئ يربك السوق العالمي.. شوف إزاي أثر على الدهب
يا ترى إيه اللي حصل في سوق الدهب بعد القرار المفاجئ اللي خده ترامب، وليه القرار ده قلب الموازين وأربك السوق العالمي وخلا أسعار المعدن الأصفر تتحرك بشكل كبير الأسبوع ده؟
القصة بدأت لما ترامب أعلن فرض تعريفات جمركية على واردات سبايك الدهب بوزن كيلو و100 أوقية، ودي خطوة جديدة لأن الدهب بيكون دايما معفي من الرسوم بسبب دوره في النظام المالي.
بس القرار ده فاجئ العالم وعمل مشاكل جديدة في سلاسل التوريد خاصة لسويسرا اللي بتعتبر أكبر مصدر للدهب، والنتيجة كانت ان سعر الدهب عالميا طلع أكتر من 3% الأسبوع اللي فات، ووصل سعر الأوقية ل 3458 دولار، وده أعلى مستوى من أسابيع، وكمان العقود الآجلة لشهر سبتمبر ارتفعت ووصلت ل3414 دولار.
لكن مش القرار ده بس اللى حرك الأسعار، ده في كمان عوامل زي استمرار القلق من التضخم وتوقعات إن الفيدرالي الأمريكي ممكن يخفض الفايدة في شهر سبتمبر، وده بيخلي الدهب دايما خيار آمن للمستثمرين.
كملن قوة الدولار وارتفاع عوايد سندات الخزانة الأمريكية حدوا من صعود الدهب أكتر، وكمان التفاؤل في أسواق الأسهم العالمية خاصة في أوروبا وأمريكا قلل شوية من الطلب عليه كملاذ آمن خاصة مع وجود أخبار عن محادثات تهدئة بين روسيا وأوكرانيا.
والتوقعات الجاية بتقول إن الاتجاه العام للدهب لسه صاعد، وفي دعم قوي حوالين 3200 – 3300 دولار للأوقية، ولو كسر حاجز 3500 دولار بشكل مستدام فممكن نشوف موجة صعود جديدة.
أما عندنا في مصر، فالدهب استقر وسجل عيار 24 حوالي 5257 جنيه وعيار 21 سجل 4600 جنيه وبردز 18 ب3942 جنيه والجنيه الدهب بقى ب 36800 جنيه.
ونقدر نقول ان القرارات العالمية زى اللي خده ترامب بتأثر بشكل غير مباشر على المواطن المصري، لأن أي ارتفاع في سعر الدهب عالميا بينعكس على السوق المحلي، وده بيخلي أسعار الشبكة أو حتى الاستثمار في السباقك والجنيهات الدهب أغلى، وده ممكن يخلي الناس تأجل انها تشتري اصلا.
لكن اللي معاه دهب وبيفكر يبيع، فالقرارات دي بتكون فرصة إنه يحقق مكسب أكبر خاصة لو الأسعار المحلية طلعت بسرعة قبل ما السوق يهدا أو ينزل تاني.
والخلاصة هي ان قرار ترامب مش بس هز السوق العالمي لكنه بعت رسالة إن حتى الملاذات الآمنة زي الدهب ممكن تتأثر بالسياسة، وده معناه إن المستثمرين لازم يكونوا مستعدين لأي مفاجآت جاية.
