مدته شهر.. الأوكازيون الصيفي فتح أبوابه والأسعار برخص التراب
يا ترى امته هيبدأ الأوكازيون الصيفي، وإيه طبيعة السلع اللي هتكون موجودة فيه، ونسبة التخفيضات هتكون كام، وهيكون في محافظات ايه بالظبط؟
الأوكازيون الصيفي قرب، ووزارة التموين داخلة بكل تقيل المرة دي عشان تضمن إن المواطن ياخد تخفيض حقيقي مش وهمي، وكمان عايزين يحطوا خريطة أسعار واضحة علشان تعرف إيه اللي هيتخفض وإيه لأ.
ومن هنا، الدكتور شريف فاروق، وزير التموين، عمل اجتماع مهم في الوزارة مع كل الجهات الرقابية، عشان ينظموا الأوكازيون الصيفي اللي بدأ رسميا يوم الاتنين 4 أغسطس، ولسه مكمل معانا لمدة شهر كامل.
وكل محل هيشارك، عنده أسبوعين يقدم فيهم عروض، بس بشرط يعلن عن نسبة التخفيض، وكمان يكتب سعر المنتج قبل وبعد الخصم بس لازم ياخد موافقة من وزارة التموين الأول، يعني كله تحت رقابة مشددة علشان مفيش تاجر يضحك عليك.
كمان، وزير التموين قال لازم نظبط السوق ونواجه أي تلاعب أو عروض وهمية، والمواطن لازم يحس إنه فعلا كسبان، مش داخل يتفرج على أسعار وهمية وبردو الوزارة شغالة بتنسيق كامل بين جهاز حماية المستهلك وشرطة التموين ومفتشي التموين في الشوارع عشان أي مخالفة تتكشف في لحظتها.
طيب إيه الحاجات اللي ممكن نلاقي عليها تخفيضات؟
كل اللي في بالك، زي مثالا هدوم وأحذية وادوات منزلية وأجهزة إلكترونية ولعب أطفال حتى المفروشات، ومتوسط التخفيضات، هتكون زي ما وزارة التموين قالت إن في تخفيضات من 15% لحد 50%، بس خلي بالك مش كل حاجة نازلة بالسعر ده، فلازم تسأل وتشوف السعر القديم قبل ما تشتري.
وبردو، الوزير قال إن في مبادرات تانية بالتوازي شغالة لضبط الأسعار زي مبادرة "خفض الأسعار" اللي نزلت بالفعل على أكتر من 30 سلعة تموينية في شهر أغسطس، وده معناه إنك لو معاك بطاقة دعم، فهتستفيد مرتين مرة من الدعم ومرة من التخفيضات.
طب وإيه اللي يضمنلي إن التخفيضات دي حقيقية؟
الوزارة أعلنت إنها هتبعت حملات تفتيش يومية على المحلات المشاركة، وهيكون في رصد ميداني من جهاز حماية المستهلك وكمان خط ساخن تقدر تبلغ من خلاله لو حسيت إن في تاجر بيغشك أو بيعرض خصم وهمي، يعني مش هيسيبوا التلاعب يعدي وأي مخالفة هتتحول لمحضر فوري وغرامة كبيرة.
أما بقى لو أنت تاجر وعندك محل وعايز تدخل في الأوكازيون، فتقدر تتوجه لمديرية التموين اللي تابع لها وتقدم طلب رسمي بالمشاركة، بس لازم تلتزم بالشروط وتكون عارض أسعارك الحقيقية وساعتها هتكون جزء من حملة قوية بتفيد المواطن، وبتزود حركة البيع في السوق.
