قفزة كبرى في احتياطي الدولار.. تعاون مهم مع فيتنام.. وهدوء في سوق الدهب
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، قفزة كبرى في احتياطي الدولار، وتعاون مهم مع فيتنام، وهدوء في سوق الدهب.
والبداية من عند البنك المركزي المصري اللي كشف إن صافي الاحتياطيات الدولية وصل لـ 49.036 مليار دولار في نهاية شهر يوليو 2025، وده يعتبر زيادة كبيرة عن شهر يونيو اللي فات اللي كان الاحتياطي فيه 48.700 مليار دولار، يعني بنتكلم عن زيادة بـ 336 مليون دولار.
الاحتياطي الأجنبي ده بيتكون من مجموعة عملات دولية رئيسية.. زي الدولار الأمريكي.. واليورو الأوروبي.. والجنيه الاسترليني.. والين الياباني.. واليوان الصيني. طريقة توزيعه على العملات دي بتعتمد على سعر صرف كل عملة واستقرارها في الأسواق العالمية، وكل ده طبعًا بيتم حسب خطة بيحطها المسؤولين في البنك المركزي.
الوظيفة الأساسية للاحتياطي ده.. اللي فيه دهب وعملات دولية مختلفة.. هي إنه يوفر السلع الأساسية للبلد.. ويسدد أقساط وفوائد الديون الخارجية.. ويواجه الأزمات الاقتصادية لو حصلت أي ظروف استثنائية أثرت على الموارد اللي بتدخل عملة صعبة لمصر.
ونروح لخبر تاني.. حيث استقبل ياسر عباس.. نائب الرئيس التنفيذي للهيئة العامة للاستثمار والمناطق الحرة.. "تران كوك".. نائب وزير المالية الفيتنامي.. عشان يناقشوا مع بعض إزاي يطوروا التعاون في الاستثمار والتجارة.. ويزودوا الاستثمارات بين البلدين.
وخلال اللقاء.. الجانبين عرضوا المميزات التنافسية اللي بتتمتع بيها بيئة الاستثمار في مصر وفيتنام. ونائب الرئيس التنفيذي للهيئة أكد على أهمية العلاقات الاستثمارية بين البلدين، خصوصًا بعد ما تم إنشاء أول مصنع فيتنامي بالكامل في مصر السنة اللي فاتت، وده بيفتح الباب لاستثمارات فيتنامية جديدة في السوق المصري، خاصةً في قطاعات مهمة زي المنسوجات والملابس الجاهزة.. والأجهزة المنزلية.. والسيارات الكهربائية.. والبتروكيماويات.
ياسر عباس دعا الجانب الفيتنامي إنهم يستكشفوا الفرص الاستثمارية ويشوفوا بأنفسهم الحوافز والضمانات اللي بتقدمها مصر، خصوصًا بعد التغييرات الكبيرة اللي عملتها الحكومة المصرية في الاقتصاد والتشريعات.. واللي خلت مصر تحتل المركز التاسع في قائمة أكتر دول العالم اللي بتستقبل استثمارات أجنبية مباشرة السنة اللي فاتت.
ونروح لسوق الصاغة.. حيث سجلت أسعار الذهب النهارده.. استقرار بسيط في بداية التعاملات. سعر جرام الذهب عيار 21.. اللي هو أكتر عيار مطلوب في السوق المصري.. وصل لـ 4595 جنيه من غير المصنعية.
وحسب منصة "آي صاغة" المتخصصة في أسعار الذهب.. الأسعار كانت كالآتي:
سعر جرام الذهب عيار 24 وصل لـ 5251 جنيه.
سعر جرام الذهب عيار 22 وصل لـ 4813 جنيه.
سعر جرام الذهب عيار 21 وصل لـ 4595 جنيه.
سعر جرام الذهب عيار 18 وصل لـ 3938 جنيه.
سعر الأوقية عالميًا وصل لـ 3373 دولار.
سعر الجنيه الذهب وصل لـ 36760 جنيه.
وآخر خبر معانا من وزارة البترول.. حيث عقد المهندس كريم بدوي.. وزير البترول والثروة المعدنية.. اجتماع مع المسؤولين في مجموعة موانئ أبوظبي، عشان يتابعوا تنفيذ مذكرة التفاهم اللي تمت بين الوزارة والمجموعة.. واللي هدفها تعزيز التعاون الإقليمي المشترك بين البلدين. الاجتماع كان بحضور "أحمد المطوع" الرئيس التنفيذي للمجموعة.. و"سيف المزروعي" رئيس قطاع الموانئ.. و"محمود فراج عمران" المدير العام لشركة تي سي إم.. ده كان خلال زيارة الوزير لدولة الإمارات.
وخلال الزيارة.. الوزير والوفد اللي معاه زاروا ميناء أبوظبي.. وسمعوا شرح عن طريقة الشغل فيه.
الوزير وضح إن المحور السادس من محاور عمل الوزارة هو ضرورة تعزيز التعاون الإقليمي المشترك.. وده اللي بيحصل دلوقتي مع موانئ أبوظبي.. عن طريق إنهم يدمجوا الإمكانات الرقمية المتقدمة والخبرات اللي عند المجموعة مع البنية التحتية المتطورة لقطاع البترول المصري.
