قفزة هائلة في احتياطيات مصر من الدولار.. إيه اللى بيحصل فى البنك المركزي؟
من ساعات البنك المركزي أعلن تجاوز احتياطي النقد الأجنبي لمصر 49 مليار دولار بنهاية يوليو 2025.. فيا ترى إيه معنى الكلام ده ؟ وايه أهمية الاحتياطي النقدي أصلا ؟ وهل ارتفاعه بالشكل ده معناه ان أزمة الدولار في مصر انتهت خلاص؟ وأن الجنيه المصري أصبح في أمان؟
بكل بساطة.. احتياطي النقد الأجنبي ده عامل زي الحصالة الكبيرة بتاعت الدولة.. الفلوس اللي فيها مش فلوس عادية.. دي فلوس بالعملات الأجنبية الصعبة زي الدولار واليورو والدهب.. الاحتياطي ده دوره الأساسي هو إنه يحمي البلد في وقت الأزمات.. ويديها قوة اقتصادية قصاد العالم كله.. الاحتياطي ده بيتكون من كذا حاجة.. زي الدهب.. والعملات الأجنبية اللي بتجيلنا من الصادرات.. والسياحة.. وقناة السويس.. وتحويلات المصريين اللي عايشين بره.. وكمان القروض والاستثمارات الأجنبية.
لما الاحتياطي ده بيزيد.. ده معناه إن مصادر الدخل بتاعتنا قوية.. وإننا بنقدر نوفي بالتزاماتنا الخارجية.. وكمان بنقدر ندخل أي سلعة محتاجينها من بره.. زي الأدوية والأكل ومستلزمات المصانع.. من غير ما يبقى عندنا أي مشكلة.
اللي حصل الشهر اللي فات.. وتحديداً في نهاية شهر يوليو 2025.. هو إن احتياطي النقد الأجنبي لمصر وصل لأكتر من 49 مليار دولار.. وده رقم تاريخي وكبير جداً.. تجاوز بيه الرقم القياسي اللي كان قبل كده.. وده بيأكد إن خطط الحكومة والبنك المركزي اللي بدأت من شهور.. بدأت تجيب نتيجة إيجابية وقوية جدا.
طب.إيه اللي وصل احتياطي النقد الأجنبي للمستوى الكبير ده؟
السبب الرئيسي هو السيولة الدولارية الضخمة اللي دخلت مصر في الفترة الأخيرة.. كان أهمها طبعاً صفقة رأس الحكمة الضخمة.. اللي لوحدها ضخت في شرايين الاقتصاد المصري عشرات المليارات من الدولارات.. غير كده.. برنامج الإصلاح الاقتصادي القوي اللي تبناه البنك المركزي.. واللي شجع المستثمرين الأجانب يرجعوا تاني لسوق الأوراق المالية المصرية.
كمان.. تحسن إيرادات السياحة.. وعودة حركة التجارة في قناة السويس لمستوياتها الطبيعية بعد التوترات الجيوسياسية في البحر الأحمر.. كل ده لعب دور كبير في زيادة إيرادات مصر من العملة الصعبة.
كل المؤشرات دي بتدينا رسالة واضحة جداً.. وهي إن مصر بتتحرك في الاتجاه الصحيح.. وإن الدولة عندها رؤية واضحة للاستقرار الاقتصادي.. وده اللي بدأنا نلمسه في استقرار سعر الصرف.. وتراجع سعر الدولار في البنوك.. والقضاء على السوق السوداء بشكل كامل.
زيادة احتياطي النقد الأجنبي لـ 49 مليار دولار مش مجرد خبر عادي.. لأ.. ده خبر ليه تأثير مباشر على حياتنا كلنا.. لأنه بيعزز ثقة المستثمرين في الاقتصاد المصري.. وبيقلل من احتمالية حدوث أي أزمة دولارية تانية في المستقبل.. وده في النهاية بيترجم لاستقرار في الأسعار.. وزيادة في القوة الشرائية للجنيه.. وفتح أبواب لفرص استثمارية جديدة.
