أولهم المواطن وتانيهم دعم الاستثمار.. شوف اهداف الحكومة من تأمين الكهرباء لاشهر الصيف
الحكومة عندها تحدي من نوع خاص وهو تأمين التغذية الكهربائية للمواطنين والأنشطة الاقتصادية في فصل الصيف.. ياتري ازاي الحكومة بتتحرك في الملف ده .. وآية اللي بتعمله الحكومة علشان ميحصلش أزمات في قطاع الكهرباء.
ملف دعم الطاقة وتأمين التغذية الكهربائية واحد من الملفات المهمة جدا علي مكتب الحكومة في الفترة الرئاسية الجديدة وده لهدفين أولهم هو تأمين التغذية الكهربائية المطلوبة للمواطن المصري وده هدف أساسي ورئيسي بالنسبة للحكومة المصرية خصوصا أن راحة المواطن المصري واحد من أهم أهداف الحكومة في الفترة الحالية.
تاني هدف للحكومة من تأمين التغذية الكهربائية هو دعم الاستثمار وقطاع السياحة خصوصا أن مفيش مستثمر في العالم هيفكر يروح يعمل مشروع أو مصنع في دولة في العالم هيا عندها مشاكل في قطاع الطاقة واللي هيا اصلا العمود الفقري للصناعات، ونفس الحال علي قطاع السياحة خصوصا أن مفيش برضوا سائح هيروح يقضي إجازة في دولة هيا اصلا مش عارفه توفر الإنارة للمواطنين عندها مفيش سائح هيدروح بلد علشان يقعد في الظلمة.
طيب إزاي الحكومة هتامن الكهرباء المطلوبة للأشهر المطلوبة لفصل الصيف ؟.
فصل الصيف واحد من الشهور اللي بيتميز بارتفاع الاحمال الكهربائية علي الشبكة الموحدة للكهرباء اللي السنة دي وصلت لارقام قياسية عمرها ما وصلت لها في التاريخ لما سجلنا 39 الف و 400 ميجاوات وده اعلي رقم الشبكة الموحدة للكهرباء وصلت له علي مدار تاريخها بسبب زيادة الاعتماد الكبير على أجهزة التكييف والتبريد.
علي مدار الشهور اللي فاتت الدولة المصرية أخذت مجموعة كبيرة من مجموعة من الإجراءات الاستباقية لتأمين التغذية الكهربائية وتفادي أية انقطاعات تؤثر على حياة المواطنين أو على الأنشطة الاقتصادية، وقامت بحملات كبيرة لصيانة المحطات الحرارية ومراكز التحكم وكمان أدخلت وحدات توليد جديدة للخدمة لزيادة القدرة الإنتاجية وتخفيف الضغط على الشبكة، ده غير جهود التوسع في الاعتماد على مصادر الطاقة المتجددة زي الطاقة الشمسية وطاقة الرياح، ضمن خطة وطنية لزيادة الطاقة الجديدة والمتجددة،. اخيرا تأمين احتياجات محطات توليد الكهرباء من الغاز الطبيعي والمازوت لضمان استمرار تشغيل المحطات بدون توقف ومؤخرا الحكومة استوردت 290 شحنة غاز طبيعي من الخارج لنامين احتياجات محطات توليد الكهرباء علي مدار الشهور اللي جاية .
مش ده بس اللي علمته الحكومة لا ده كمان الدولة المصرية توسعت في زيادة خطوط الربط الكهربائي مع دول الجوار زي الأردن وليبيا والسودان كخطوة استراتيجية لتبادل الطاقة في أوقات الذروة وفي خطط حاليا لزيادة مشروعات الربط الكهربائي مع دول السعودية وقبرص واليونان، والهدف من الخطوط دي هو تبادل الطاقة مع دول الجوار في أوقات الذروة بمعني لو عندهم زيادة في الطاقة ناخذ منهم ولو عندنا زيادة هما ياخذوا مننا .
كل التحركات اللي قامت بيها الحكومة كان بها نتائج إيجابية علي الاقتصاد المصري خصوصا في الجزء المتعلق بزيادة الاعتماد علي مصادر الطاقة المتجددة واللي وفرت لمصر ما يقرب من 500 مليون دولار شهريا كانت الدولة بتخصصهم لاستيراد الغاز الطبيعي والمازوت لتشغيل محطات توليد الكهرباء.
