الدهب يتراجع.. شوف أسعار المعدن الأصفر هتوصل لفين مع نهاية يوليو
يا ترى إيه اللي حصل للدهب، وليه الأسعار بتتراجع الفترة دي، وهل فعلا المعدن الأصفر خلاص فقد بريقه؟ في الحقيقة، الدهب اتراجع بنسبة 0.4% خلال الأسبوع اللي فات، وده مش بس في مصر، ده كمان على مستوى البورصة العالمية، يعني الأوقية نزلت من 3350 ل3337 دولار، وده انعكس على السوق المحلي.
كمان، الجرام عيار 21 بقى ب4630 جنيه بعد ما كان 4650، وعيار 24 سجل 5291 جنيه، وعيار 18 ب 3969، وعيار 14 ب 3087، أما الجنيه الدهب فوصل ل 37040 جنيه.
طيب، ليه الدهب نزل؟
بص يا سيدي، السبب الرئيسي هو إن الاقتصاد الأمريكي اتعافي شوية، وده لأن البيانات الجديدة بتقول إن سوق العمل عندهم قوي، والناس مش بتطلب إعانات بطالة زي زمان، وده خلا المستثمرين يحسوا إن الدنيا مستقرة، ومفيش داعي للهرب ناحية الملاذات الآمنة زي الدهب.
غير كده، في تقدم كبير في المفاوضات التجارية بين أمريكا وشركائها زي اليابان وأوروبا، وده خفف التوترات الاقتصادية، وقلل الإقبال على الدهب.
كمان، الدولار رجع يقوى، وده عامل ضغط على الدهب حتى مع انخفاض عوائد السندات الأمريكية، لأن الناس بدأت تدور على استثمارات تانية فيها ربح أعلى.
طيب، إيه اللي ممكن يحصل الأسبوع الجاي؟
الفيدرالي الأمريكي هيعلن قراره بخصوص الفايدة يوم 30 يوليو، وكل السوق مستني يشوف هل هيثبتوا الفايدة في نفس النطاق من 4.25% ل4.5% ولا في مفاجأة جاية، بس لو حصل تغيير في السياسة النقدية، زي خفض الفايدة مثلا فممكن نشوف الدهب بيرتفع تاني.
كمان، هنسمع عن أرقام الناتج المحلي للربع التاني، ومؤشرات الإنفاق وأرقام الوظائف، يعني أسبوع مولع وكل خبر فيه ممكن يهز السوق.
ونقدر تقول، إن الدهب دلوقتي في حالة استقرار بعد ما كان مولع في أبريل، وقت ما كان قرب يوصل ل3500 دولار للأوقية بسبب التوترات الجيوسياسية، بس مع هدوء الأوضاع وتقدم المفاوضات التجارية، الزخم ده بدأ يهدى خاصة إن الطلب الفعلي على الدهب في أسواق كبيرة زي الهند قل شوية بسبب ارتفاع الأسعار، لكن ده مش معناه إن الدهب انتهى، لأ ده البنوك المركزية لسه بتشتريه عشان تقلل اعتمادها على الدولار، بس الشراء في 2025 أقل من السنة اللي فاتت.
والتوقعات، هي ان الدهب ممكن يطلع ويوصل ل4000 دولار في سيناريو متفائل، وممكن كمان ينزل ل 2800 لو الظروف فضلت تتحسن، يعني لازم تتابع الأخبار دايما لو مهتم بالدهب وتفهم السوق، قبل ما تاخد قرار شراء أو بيع.
