إزاي تقدر تشتغل بـ500 دينار شهريا في الأردن؟.. فرصة عظيمة للمصريين
حاسس إنك مش لاقي فرصة شغل كويسة؟، بتفكر تسافر بس مش عايز تتغرب على الفاضي؟.. نفسك تشتغل برة وتحوش فلوس كويسة في وقت قليل؟.. طب إيه رأيك لو قلتلك إن في تعاون جديد بين مصر والأردن هيحققلك ده؟.. وعارف إن المرتبات هناك بقت مجزية.
في خطوة بتأكد إن الشغل مش بس في بلدك، لأ كمان جارك ممكن يفتحلك باب رزق محترم، مصر والأردن اتفقوا على حاجة هتفيد آلاف الشباب المصريين.. إيه هي؟ تصدير عمالة مصرية للأردن بمرتبات مجزية وظروف كويسة.
يعني لو أنت شاب مصري بتدور على فرصة شغل كويسة برة، ومعاك مؤهل أو حتى شاطر في صنعة من الصنايع، الأردن ممكن تكون محطتك الجاية.. ليه؟، لأن الحكومة الأردنية فتحت باب التقديم لعمالة مصرية في مجالات كتير: زي الإنشاءات، والزراعة، والفنادق، والمطاعم، وحتى التمريض.
والحلو بقى إن المرتبات هناك بقت منافسة، وفيه سكن وتنقلات في بعض العقود، وكمان التأمين الصحي متوفر، يعني مش بس هتسافر، ده كمان هتعيش كويس وتكون نفسك.. والخطوة دي جاية بعد تنسيق مباشر بين وزارتي العمل في مصر والأردن، عشان يسهلوا الإجراءات، ويوفروا فرص حقيقية بدون سماسرة أو نصب.
وزارة العمل المصرية أعلنت عن 37 فرصة شغل جديدة في الأردن، في شركات محترمة، وفي تخصصات مختلفة.. كمان بمرتبات حلوة!
المرتب بيتراوح ما بين 290 لـ 500 دينار أردني في الشهر، وده طبعًا حسب شغلك وخبرتك.. والوظايف دي جزء من خطة الوزارة لفتح أبواب رزق برة مصر قدام الشباب، بالتنسيق مع الإدارة المركزية للعلاقات الدولية، والإدارة العامة للتشغيل والتمثيل العمالي بالخارج.
التقديم بدأ من يوم الخميس 24 يوليو 2025، ولسه قدامك 5 أيام بس تقدم.. يعني متكسلش… فرصة زي دي ما تتعوضش.. والتقديم من خلال الرابط الرسمي اللي نزلته الوزارة.
طيب إيه الوظايف المطلوبة؟
التخصصات المطلوبة، هي 2 عمال إنشاءات و3 عمال في مصنع شيكولاتة (لازم خبرة في الشيكولاتة الدراچية والملبس، وتحميص وصيانة الماكينات)، ده غير أنهم محتاجين 16 عامل في تربية دواجن بياض ويكون عندهم خبرة، كمان محتاجين عامل مكبس طوب ويكون خبرة في التحميل والتنزيل.
كمان مطلوب 8 عمال إنتاج في الصناعات الغذائية ويكون عندهم خبرة سابقة أساسية، ده غير مطلوب 2 عمال في مصنع ملابس، وجه لازم يكون بيفصل قميص وألبسة مهنية، ده بجانب أنه مطلوب عامل ماكينة طباعة ويكون خبرة في تشغيل ماكينات فليسكو.
الأردن كمان طلبت 2 عمال في مطبعة، ولازم يكون اشتغل قبل كده على آلات الطباعة، ده غير أنه مطلوب 2 عمال منشار حجر.
يعني الفرص كتير، والتخصصات متنوعة، والمرتبات مجزية.. ولو أنت أو حد تعرفه مؤهل لأي وظيفة من دول، ماتفوتوش الفرصة.
