موسم صعود الفضة.. هل تتحول لملاذ آمن دائم وتسحب البساط من الذهب؟
يا ترى، الفضة ناوية على إيه، هل فعلا ممكن تبقى البديل الجديد للدهب، ولا كل اللي بيحصل ده موجة ارتفاع مؤقتة وهترجع تاني لمكانها؟
خلال الأسبوع اللي فات، الفضة عملت شغل عالي جدا، الأوقية لمست أعلى مستوياتها من أكتر من 14 سنة، بس بعد كده حصل شوية جني أرباح، ورجعت تهدى شوية، ورغم كده لسه الناس بتراهن إنها تكمل طلوع.
وعندنا في السوق المحلي في مصر، عيار 800 وصل لحد 53 جنيه، وعيار 925 حوالى 60 جنيه، أما عيار 999 الأغلى فسجل حوالي 65 جنيه، وكمان الجنيه الفضة (عيار 925) فسعره حوالي 480 جنيه، وجه معناه إن الأسعار بتتحرك وناس كتير بدأت تبص على الفضة بعين تانية.
وعالميا، الاوقية بدأت الأسبوع على 38.32 دولار، وطلعت ل39.13 دولار ودي أعلى نقطة من 2011، لكن قفلت على 38.11 دولار، يعني انخفاض بسيط جدا.. طب ليه الطلوع ده كله؟ وليه فيه ناس شايفة إن الفضة بقت ملاذ آمن؟
أول حاجة هي ان العائد على السندات الأمريكية نزل، وده بيخلي المستثمرين يهربوا للمعادن، لأنها بتحافظ على القيمة وقت الأزمات، وتاني حاجة، هي الفيدرالي الأمريكي اللي بيلمح إنه هيخفض الفايدة قريب، وده بيزود شهية الناس للمعدن الأبيض، وثالث حاجة طبعا هي الدولار نفسه اللي نزل شوية، وده دعم الفضة كمان.
ورابع حاجة والأهم، وهي التوترات العالمية زي مثلا حرب تجارية متوقعة بين أمريكا وأوروبا، فده بيخلي السوق يلجأ لأصول آمن زي الفضة.. والسؤال المهم دلوقتي، هل الفضة هتسخب البساط من الدهب؟
بص يا سيدي، بنك سيتي بيقول آه ممكن، وبيحذر إن الفضة ممكن توصل ل 40 دولار خلال سنة وممكن تلمس 46 دولار كمان.
وده راجع لحاجتين مهمين، وهنا الطلب الصناعي اللي بيزيد، وكمان المعروض اللي بيقل، وغير كده نسبة سعر الدهب للفضة دلوقتي 87.3، في حين المعدل الطبيعي حوالي 53، يعني الفضة مقومة بأقل من قيمتها، ولو رجعنا للنسبة العادلة دي، فيبقى سعر الفضة المفروض يبقى 63 دولار، وده يعني صعود 65% من السعر الحالي.
يعني باختصار، الفصة بقت أداة استثمارية وسلاح في محفظة المستثمرين، ولو الظروف فضلت زي ما هي من توترات وتيسير نقدي وانخفاض في المعروض، هيبقي إحنا قدام موجة صعود ممكن تستمر شهور، أو حتى سنين.
بس بردو ، لازم نخلي بالنا بان الفضة معدن متقلب أكتر من الدهب، يعني اللي هيدخل لازم يبقى عارف إنه داخل على مخاطرة أعلى، لكن العائد لو كمل، هيكون كبير جدا.
وفي النهاية، نقدر نقولك إنك لازم تتابع قرارات الفيدرالي، وشوف حركة الدولار واغمل متابعة بسيطة لأخبار الصين وأمريكا ده لو ناوي تستثمر فلوسك في الفضة.
