حسن عبدالله بيعمل إيه في جنوب افريقيا؟.. مهمة خاصة في توقيت حرج
يا ترى إيه اللي بيخلي كل الأنظار متسلطة على جنوب أفريقيا الأيام دي؟ وليه حسن عبدالله محافظ البنك المركزي المصري، واخد اهتمام كبير وسط كل الزحمة دي؟ وايه حكاية الاجتماعات اللى بتستضيفها جوهانسبرج؟
في جنوب افريقا وعل مدار يومين عقد الاجتماع التالت لسنة 2025 لوزراء المالية ومحافظي البنوك المركزية لدول مجموعة العشرين "G20".. ومصر كانت موجودة وبقوة بوفد رسمي كبير برئاسة حسن عبدالله محافظ البنك المركزي.
الوفد المصري ضم ياسر صبحي – نائب وزير المالية للسياسات المالية، ومنة الله فريد – وكيل المحافظ للعلاقات الخارجية، وعلاء عبدالرحمن – مستشار وزير المالية للمؤسسات الدولية.
طب إيه اللي دار جوه الاجتماعات؟
حسن عبدالله شارك في جلسات كانت بتناقش قضايا تقيلة زي الاقتصاد الكلي العالمي، الهيكل المالي الدولي، معوقات التنمية في أفريقيا، التمويل المستدام، والشمول المالي.
الراجل وقف وقالها بصراحة: "العالم دلوقتي بيتعرض لضغوط كبيرة بسبب الحروب التجارية والتوترات الجيوسياسية، ولازم يكون فيه تنسيق بين السياسات النقدية والمالية عشان نقدر نحافظ على استقرار الاقتصاد."
وكمل كلامه وقال إن السيطرة على التضخم وتحسين إدارة السيولة مش رفاهية، ده أساس أي إصلاح اقتصادي ناجح.
مش بس كده.. حسن عبدالله شدد على ضرورة إصلاح الهيكل المالي العالمي وتوسيع التمثيل الأفريقي فيه.. وقال إننا محتاجين آليات جديدة لتحفيز استثمارات القطاع الخاص، وكمان لازم يكون فيه نظام شفاف لمتابعة وتنفيذ القرارات
كمان اتكلم عن خطورة النمو السريع للمؤسسات المالية غير المصرفية من غير وجود رقابة قوية، وده ممكن يهدد الاستقرار المالي العالمي.
واحدة من النقاط اللي خدت اهتمام كبير هي إدارة الديون.. حسن عبدالله دعا لضرورة وجود حوار حقيقي بين الدول الدائنة والمدينة ووكالات التصنيف عشان نلاقي حلول عملية للديون المتراكمة.
وطالب كمان إن "الإطار المشترك" يشمل الدول متوسطة الدخل اللي بتعاني من نفس الأزمات.
ومن الحاجات اللي ركز عليها حسن عبدالله هي التمويل الميسر للدول النامية وربط الاستثمارات بأولويات التنمية الوطنية، وتطوير أدوات لتقاسم المخاطر. وأشار للتحديات اللي بتواجه الدول النامية زي نقص التمويل الأخضر وقلة المشروعات الاستثمارية المستدامة.
كمان قال إننا لازم نطور الأسواق المالية المحلية ونستفيد من الذكاء الاصطناعي في تحسين الإنتاجية والخدمات، وده كله عشان نقدر نبني اقتصاد أقوى.
حسن عبدالله ختم مشاركته برسالة قوية قال فيه ان "الشمول المالي هو المفتاح لتحقيق نمو عادل وشامل، ولازم نوسع الخدمات للمشروعات الصغيرة والمتوسطة ونبتكر أدوات تقييم جديدة، خصوصًا في عصر الذكاء الاصطناعي."
