33% ارتفاعا فى الصادرات.. شوف الأسباب وإزاي مصر تستغله صح
يا ترى إيه اللي خلا الصادرات المصرية تقفز بنسبة ٣٣٪، وإزاي ممكن نستغل الرقم ده ونحوله لدفعة جديدة للاقتصاد؟
في الفترة الأخيرة، الاقتصاد المصري بيشهد تحسن تدريجي في مؤشرات مهمة، لكن الرقم اللي لفت الأنظار فعلا هو ارتفاع الصادرات بنسبة 33%، وده مش رقم صغير خالص.
وده لان الزيادة دي حصلت في وقت العالم كله بيتكلم عن تباطؤ نمو وركود ومشاكل في سلاسل الإمداد.. طيب يا ترى إيه السبب؟
بص يا سيدي، أحمد كجوك وزير المالية، قال في لقاء بلندن إن الحكومة شغالة على مبادرات قوية زي مبادلات ديون مقابل استثمارات، وتحفيز النمو ودعم القطاع الصناعي، وكمان تشجيع الصادرات بكل الطرق.
والوزير أكد إننا شغالين على بناء ثقة حقيقية بين الدولة وبين المستثمرين والممولين، وده من خلال تسهيل الإجراءات وتحسين الخدمة وتطبيق إصلاح هيكلي شامل لكل المصالح الحكومية.
طيب نرجع للصادرات، نقدر نقول إن اللي ساعد على القفزة الكبيرة دي هو شوية حاجات مهمة، زي تحسن التصنيع المحلي وده قطاع بيقود النمو بقوة دلوقتي، وكمان فتح أسواق جديدة برا مصر، خاصة في أفريقيا ودول الخليج.
كل ده غير التسهيلات اللي بتقدمها الحكومة للمصدرين من خلال المجالس التصديرية وبرامج دعم التصدير، والأهم إن في استقرار نسبي في السياسة النقدية وسعر الصرف، فبقى عندنا بيئة أحسن لتشجيع الاستثمار.
ومن هنا، الوزير كجوك كمان قال إن الاستثمارات الخاصة زادت بنسبة 77%، وده بيعني إن فيه ثقة بترجع تدريجي في السوق المصري، والمستثمر بقى شايف فرص حقيقية للربح، يعني مش بس بنصدر أكتر، ده كمان في ناس بتضخ فلوس أكتر جوه البلد.
طب نستخدم الزيادة دي في إيه؟
في الحقيقة، لو عايزين نستغل الارتفاع في الصادرات صح، فاحنا محتاجين نشتغل على كذا محور، يعني مثلا نوسع قاعدتنا الإنتاجية وننتج أكتر وبجودة أعلى.
كمان لازم نركز على التصنيع التصديري، يعني ننتج بهدف التصدير من البداية، ده بجانب لاننا ندعم الصناعات الصغيرة والمتوسطة اللي تقدر تدخل على خط التصدير، وكمان نروج للمنتج المصري في أسواق جديدة مش تقليدية.
والخلاصة هي ان الزيادة في الصادرات رقم حلو ومهم، لكن الأهم هو نحافظ عليه ونكبره، وده لان ال ال ٣٣٪ زيادة في الصادرات مش نهاية الرحلة، دي مجرد إشارة إننا ماشيين في اتجاه صح، بس لسه قدامنا شغل كتير، ولو الحكومة قدرت تستغل الزخم ده،ممكن مصر تحجز لنفسها مكان قوي في سلاسل التوريد العالمية، ونبدأ نشوف أثر الصادرات ده في التشغيل والنمو والعملة الصعبة.
