"تطبيق دعم المستثمرين" هدية وزارة الصناعة لرجال الأعمال.. شوف المزايا وأهم مهماته
يا ترى إيه فايدة تطبيق دعم المستثمرين اللي أطلقته وزارة الصناعة قريب، هل فعلا هيكون حل نهائي للمشاكل اللي بتواجه المستثمرين الصناعيين في مصر بكبسة زر، وهل فعلا أي استفسار عندك بقى ليه رد رسمي من الوزارة من غير ما تتحرك من مكتبك؟
في الحقيقة، وزارة الصناعة قررت تدلع المستثمرين، وأطلقت رسميا تطبيق جديد اسمه "دعم المستثمرين"، واللي هو حرفيا بيسهل حياتك كمستثمر، ويخلي الوزارة كلها في جيبك.
والتطبيق ده متاح ع الموبايل، بتحمله على تليفونك من المتاجر الإلكترونية، وبعدين بتدخل بياناتك وتبعت استفسار أو شكوى، وتوصلك الردود من الجهة المسؤولة من غير ما تروح مشاوير ولا تستنى في طوابير.
والأجمد، ان االتطبيق دهبيشتغل على أندرويد حاليا، وقريب جدا نسخة ل iOS كمان جاية، اما بالنسبة لخطوات استخدامه، فهي بسيطة جدا، بتفتح التطبيق وتختار "ابدأ"، بعدين تسجل بياناتك (اسمك، رقمك، الإيميل، النشاط بتاعك، والمحافظة)، بعدين تختار نوع الخدمة (شكوى أو استفسار)، وتكتب التفاصيل، ولو عندك مستندات تدعم الشكوى تقدر ترفق لحد 5 صور، بعدين تضغط "سجل"، وخلاص.
بعد كل ده، هيجيلك إشعار إن الشكوى وصلت للجهة المختصة، ولما يردوا بتوصلك النتيجة على طول، وتقدر كمان تتابع شكوتك لحظة بلحظة، وتبعت استعجال لو الموضوع طول، وكمان تراجع استفساراتك القديمة ووتعدل بياناتك وقت ما تحب.
يعني باختصار، الوزارة عاملة وحدة اسمها "دعم المستثمرين"، شغلتها تتابع شكاوى المستثمرين الصناعيين وتحلها بالتنسيق مع كل الهيئات، وده جزء من خطة أوسع لتحسين مناخ الاستثمار الصناعي في مصر، يعني التطبيق ده هدية عملية من وزارة الصناعة لكل صاحب مصنع أو مشروع صناعي.
يعني لو انت مستثمر او رجل أعمال وبتعاني من البيروقراطية في تنفيذ مشروعك في المصالح الحكومية، فالتطبيق ده هيسهلك كل امورك وهيبسط لك الدنيا، وهيخلي مشروعك مش مجرد حلم لأ ده واقع موجود فعليا وبمباركة الحكومة كمان.
