مفاجأة سارة بخصوص الجنيه.. تراجع مفاجئ للذهب.. وطرح جديد من المركزي لأذون الخزانة
ينشر بانكير آخر حصاد اخباري خلال الساعات القليلة الماضية والبداية من بنك جولدمان ساكس، اللي قال في تقرير حديث إن الجنيه المصري لسه أقل من قيمته الحقيقية بحوالي 30%، وده بيزوّد فرص إنه يعلى في الفترة الجاية. التوقع ده جاي مدعوم باستمرار تدفقات استثمارات المحافظ وتحسّن المؤشرات النقدية.
التقرير وضّح إن استقرار الجنيه بعد تخفيض قيمته في مارس 2024، واختفاء الفرق بين السعر الرسمي وسعر السوق السودا، بيعكس إن فيه ثقة أكبر في سياسة سعر الصرف، رغم التحديات الجيوسياسية في المنطقة.
كمان البنك قال إن التوقعات المستقرة دي ساعدت في تجنب تقلبات كبيرة، والسعر الرسمي للجنيه بقى بيتحرّك في نطاق ضيق من أول 2024.
جولدمان ساكس لفت إن فيه عوامل قوية بتدعم الجنيه، زي زيادة الاحتياطي الأجنبي وتحويل صافي الأصول الأجنبية في القطاع المصرفي لفائض بـ 4.8 مليار دولار في مايو اللي فات، وده تحول إيجابي جدًا بعد ما كان فيه عجز حوالي 17.6 مليار دولار في أول 2023.
نروح لأسعار الدهب.. اللي نزلت شوية في السوق المحلي أمس الخميس 17 يوليو 2025، وسجّل عيار 21 حوالي 4645 جنيه.
سعر الدهب عيار 21 وصل لـ 4645 جنيه للجرام، وده أكتر عيار بيتباع في السوق.
عيار 24 وصل لـ 5308.5 جنيه للجرام، وده أغلى عيار في مصر.
عيار 18 وصل لـ 3981.5 جنيه للجرام.
عيار 14 وصل لـ 3096.75 جنيه للجرام.
أما الجنيه الدهب فسعره حوالي 37160 جنيه ووزنه 8 جرامات عيار 21.
أسعار الدهب في مصر بتختلف حسب المصنعية، ودي بتتراوح من 150 لـ 400 جنيه، وده حسب نوع العيار والمحلات وكمان اختلاف المحافظات والتجار.
ونروح للبنك المركزي اللي طرح النهارده أمس الخميس 17 يوليو 2025، أذون خزانة محلية بـ 90 مليار جنيه على آجال 6 شهور وسنة.
الآجل الأول بـ 40 مليار جنيه، هيتم إصداره يوم 22 يوليو 2025، ويستحق في 20 يناير 2026.
أما الآجل التاني بـ 50 مليار جنيه لمدة سنة، ويستحق في 21 يوليو 2026.
القانون بيلزم البنوك والمؤسسات المالية بالحفاظ على سرية حسابات العملاء، ومينفعش يعلنوا عن أرصدتهم أو بياناتهم غير في حالات محددة بالقانون.
الضوابط دي معمولة عشان تحمي الخصوصية وتعزز الثقة في النظام المصرفي، ومينفعش يتم الكشف عن الرصيد أو المعاملات إلا بقرار قضائي أو طلب من جهات معينة بالقانون.
ونروح للمهندس كريم بدوي وزير البترول والثروة المعدنية، اللي استقبل المهندس عصام حوراني رئيس مجلس إدارة شركة مناجم النوبة اللي شغالة في التنقيب وإنتاج الدهب، ومعاه الوفد المرافق، وده كان على هامش منتدى مصر الدولي للتعدين 2025، بحضور الجيولوجي ياسر رمضان رئيس الهيئة المصرية العامة للثروة المعدنية والصناعات التعدينية.
اتكلموا عن أنشطة الشركة الحالية وخططها في البحث والتنقيب وإنتاج الدهب في مناطق الامتياز بتاعتها.
المهندس كريم بدوي رحب بالشركة ونشاطها في مصر ورغبتها في التوسع في استثماراتها في خامات تانية غير الدهب، وأكد إن الوزارة والهيئة جاهزين يقدموا كل الدعم عشان يحققوا النجاح سوا.
