مشروع مصري صيني هيغير خريطة الانتاج والتصدير للمستلزمات الطبية.. شوف ايه الحكاية
مصر وقعت مشروع هيغير خريطة التصدير الطبي مع الصين.. ياتري اية المشروع ده.. واية مستهدفات مصر منه .. واية المجال اللي هيكون فيه المشروع.
الفترة اللي فاتت القطاع الطبي المصري اثبت انه من افضل القطاعات الصحية في العالم، وده اللي اثبتته التجربة خصوصا تجربة انتشاء الوباء العالمي لفيروس كورونا المستجد واللي مصر كانت قدرت تتصدي له وكمان تصدر مهمات طبية لعدد كبير من دول العالم الصديقة لمصر.
في الفترة اللي فاتت مصر استقبلت طلب من دولة الصين لتدشين مشروع هيغير خريطة الصادرات المصرية من المنتجات الطبية، وكمان هيوفر علي مصر مليارات الدولارات كانت الحكومة بتخصصهم لاستيراد عدد كبير من المنتجات الطبية اللي بيحتاجها السوق المصري، والمجال ده هو مجال تصنيع الاطراف الصناعية.
في كل دول العالم المجالات الطبية واحدة من المجالات اللي الحكومات بتخصص لها ارقام كبيرة جدا من الموازنة العامة للدول علشان توفر الخامات والأدوية والمستلزمات الطبية اللي المواطنين محتاجيها.
طيب ليه مصر مركزه اهتمامها علي المجالات الطبية واية مستهدفات مصر منها لتنشيط الاقتصاد؟.
الفترة اللي فاتت الحكومة اخذت خطوات مهمة جدا لزيادة الانتاج المحلي لسوق الدواء، وده وفر علي الحكومة ارقام كبيرة جدا كانت الدولة بتخصصهم سنويا لاستيراد الأدوية، خصوصا أن قطاع الدواء واحد من القطاعات اللي الدولة مش هتقدر ترفع ايدها عنه في الاستيراد مهما وصلت الفاتورة الاستيرادية.
الاهتمام الكبير اللي الحكومة قامت بيه خلي الحكومة تنجح في توفير أكثر من 98% من الأدوية اللي بيحتاجها السوق المصري، وبقي عندنا فائض كبير الدولة خصصته للتصدير للخارج، وبالتالي الحكومة نجحت في توفير أرقام كبيرة جدا كان مخصص للاستيراد، وكمان فتحنا باب جديد لزيادة موارد الدولة من الدولار من خلال التصدير وفعلا الصادرات المصرية من الأدوية وصلت لأكثر من 737 مليون دولار، وفقا للبيانات اللي اصدرتها هيئة الدواء.
طيب ايه المشروع الجديد واللي مصر هتعمله مع الصين؟.
في الفترة اللي فاتت وعلي هامش زيارة رئيس الدولة الصيني للقاهرة، الحكومة ممثلة في وزارة التخطيط والصحة والسكان وقعت اتفاقية مع الصين لانشاء مصنع لانتاج الاطراف الصناعية بمبلغ هيوصل لمليون و520 ألف يوان صيني، والهدف من المشروع ده هو تحويل مصر لمركز إقليمي في منطقة الشرق الأوسط وأفريقيا لتوفير الأطراف والأجهزة التعويضية لذوي الإعاقة، والمشروع ده هيخلي مصر تمتلك قدرة تصنيعية جديدة لصناعة من الصناعات اللي هتكون بجودة وخامات مش متوفرة في السوق المصري ، وهيرفع حجم الصادرات المصرية للخارج.
التوجه الصيني الجديد واللي هيدخل مصر خلال الفترة اللي جاية هدفه استغلال التسهيلات الكبيرة اللي قدمتها الحكومة المصرية للشركات والاستثمارات الأجنبية، ده غير أن مصر عندها خطة لمبادلة ديونها الخارجية للصين باستثمارات صينية في السوق المصري.
