إزاي مشروعات الطاقة المتجددة هتساهم في تعزيز الدخل القومي؟.. شوف آخر المستجدات
هل فعلا الطاقة الشمسية وطاقة الرياح ممكن تبقى سبب في زيادة دخل مصر، وهل التحول للطاقة النظيفة مجرد رفاهية ولا حلم اقتصادي هتحققه مصى قريب؟
اللي بيحصل دلوقتي في مصر مش مجرد مشروعات طاقة، لأ ده احنا قدام تحول طاقي شامل، لان الدولة بتشتغل عليه بخطوات مدروسة علشان تقلل الاعتماد على مصادر الطاقة التقليدية، وتفتح باب جديد للدخل القومي.
ومن هنا ، الدكتور محمود عصمت وزير الكهربا، اجتمع مع وزير قطاع الأعمال العام المهندس محمد الشيمي، علشان يناقشوا التعاون في ملفات مهمة زي كفاءة استهلاك الطاقة في المصانع الثقيلة، وكمان توسيع استخدام الطاقة المتجدد، ده غير مشروع كبير لتشغيل مجمع الألومنيوم في نجع حمادي بالطاقة الشمسية.
طيب، كل ده إيه علاقته بالدخل القومي؟
بص يا سيديؤ، لما المصانع تشتغل بالطاقة الشمسية بدل ما تعتمد على الكهرباء التقليدية، فده بيقل استهلاكها للكهربا، وده معناه توفير في التكاليف، وكمان تقليل الضغط على الشبكة، وفوق كل ده تقليل فاتورة الاستيراد للغاز والبترول، وده في الآخر بيرجع على الدولة بدخل إضافي ويوفر عملة صعبة.
كمان، الحكومة بتحط الطاقة المتجددة في قلب خطة التنمية، لأن الهدف الوصول ل 42% من إجمالي الطاقة المولدة من مصادر متجددة سنة 2030، و65% سنة 2040، يعني في خلال سنين بسيطة، مصر هتبقى واحدة من الدول الرائدة في مجال الطاقة النظيفة في المنطقة.
والموضوع مش بس على مستوى الدولة، لأ ده كمان فيه اتجاه كبير لتوسيع مشاركة القطاع الخاص، من خلال الاتفاقيات الثنائية بين منتجين ومستهلكين للطاقة، يعني مصنع يتفق مع شركة طاقة شمسية مباشرة، من غير وسطاء.
وطبعا، كل ده بيفتح الباب للاستثمار الأجنبي والمحلي، وبيخلق فرص عمل وكمان بيشجع على توطين الصناعات زي إنتاج البطاريات والمهمات الكهربائية، وده كله داخل تحت مسمى الاقتصاد الأخضر.
كمان، وزير الكهرباء قال إننا عندنا مشروعات قومية لنقل التكنولوجيا وتوطين الصناعة، ونجحنا بالفعل في نماذج كتير بتحقق كفاءة أعلى وترشيد حقيقي لاستهلاك الكهرباء.
أما وزير قطاع الأعمال، فشدد على إن كفاءة الطاقة مش بس حاجة بيئية، لأ دي ركيزة أساسية لتعزيز الإنتاج وتقليل التكاليف، وكل ده بيزود أرباح الشركات، وبيقوي قدرتها على المنافسة عالميا.
والخلاصة، هي إن الطاقة المتجددة بقت كنز اقتصادي، مش بس علشان نحمي البيئة، لكن لأنها بتحقق معادلة صعبة من كفاءة تشغيلية وتقليل تكلفة وكمان دخل قومي إضافي، عشان كده مصر ماشية بخطى ثابتة عشان تكون مركز إقليمي للطاقة النظيفة في الشرق الأوسط.
